Т.САЙХАН Ерөнхий сайд У.Хүрэлсүхийн урилгаар БНСУ-ын Ерөнхий сайд Ли Наг Ён манай улсад албан ёсны айлчлал хийж байна. Түүний айлчлал өчигдөр өглөө эхэлж,  Ерөнхий сайд У.Хүрэлсүх тэргүүтэй албаныхан Д.Сүхбаатарын талбайд угтан авсан юм. Эзэн Чингис хааны хөшөөнд хүндэтгэл үзүүлж, түүний дараа  хоёр орны Ерөнхий сайд нар хэлэлцээрийн ширээнд суулаа. Яригдсан онцлох асуудлууд нь 300 сая ам.долларын буцалтгүй тусламжаар 10 аймагт ДЦС-ийн ажил хийгдэж буйг яаравчлуулах, 500 сая ам.долларын хөнгөлөлттэй зээлийн хүрээнд Сонгинохайрхан дүүрэгт Солонго I, II хорооллыг барих. Ингэснээр 1500 айл түрээсийн орон сууцанд орох юм байна. Түүнчлэн ирэх жил Стратегийн түншлэлийн харилцаагаа нэг шат ахиулахаар тохиролцлоо. Эмч нарыг түлхүү мэргэшүүлнэ. Соёл урлаг, спортын уралдаан тэмцээнүүд ирэх жил буюу дипломат харилцаа тогтоосны 30 жилийг угтаж хийнэ, хоёр улсын Засгийн газар хоорондын IV хурлыг энэ оны эхний хагаст хуралдуулах, стратегийн түншлэлийн хүрээнд визгүй зорчих асуудлыг судалж, шийдвэртэй ажиллахаа БНСУ-ын Ерөнхий сайд илэрхийлсэн юм. Мөн тэрээр “Өнгөрсөн онд У.Хүрэлсүх сайд анхны айлчлалаа манай улсаас эхэлсэн. Харин би энэ оны анхны айлчлалаа Монгол Улсаас эхлүүлж байна. Хоёр орны дипломат харилцаа өнгөрсөн хугацаанд үсрэнгүй хөгжсөн. Өнгөрсөн онд л гэхэд хоёр орны 200 мянган иргэн харилцан зорчсон нь үүний тод илрэл юм. Солонгос улс Монголын хувьд худалдааны дөрөвдөгч түнш төдийгүй, хөрөнгө оруулалтын хэмжээгээр зургадугаар байрт жагсдаг. Цаашдаа аж үйлдвэрийн салбараас гадна байгаль орчин, эрүүл мэндийн салбарт хамтран ажиллах өргөн боломж бий” гэв. Ийнхүү зарим асуудлаар хэлэлцээ хийсний дараа Солонго I, II хорооллыг барих барилгын  төлөвлөгөөтэй Ерөнхий сайд Ли Наг Ён танилцсан. Дараа нь Ерөнхийлөгч Х.Баттулгад бараалхлаа. Тэд ОХУ-ын Владивосток хотод болсон Дорнын эдийн засгийн IV чуулга уулзалтын үеэр уулзсанаас хойш ийнхүү дахин уулзаж байгаа юм байна. 2020 онд Монгол Улс-БНСУ хооронд дипломат харилцаа тогтоосны 30 жилийн ой болох бөгөөд энэ ойг өндөр хэмжээнд, үр дүнтэй тэмдэглэн өнгөрүүлэх саналтай буйгаа Ерөнхийлөгч Х.Баттулга илэрхийлсэн байна.Хоёр улсын залуусын бизнес зөвлөл байгуула, Монгол Улсад хөдөө аж ахуй, хүнс, аялал жуулчлал зэрэг салбарт бизнесийн орон зай, харин БНСУ-д ноу-хау, технологи байгаа учраас хоёр орны залуусыг уялдаа, холбоотой болгон, бизнес зөвлөл байгуулах бүрэн боломжтой гээд энэ хүрээнд хийгдсэн судалгаа, төслүүдийг БНСУ-ын Ерөнхий сайд Ли Наг Ёнд гардуулан өгсөн.  Мөн БНСУ-ын Ерөнхийлөгч Мүн Жэ Иний санаачилсан зүүн Азийн төмөр замын сүлжээг дэмжин ажиллаж байгаагаа илэрхийлж, энэ нь бүс нутгийн дэд бүтэц болоод далайд гарцгүй Монгол Улсад хэрэгтэй санаачилга хэмээн онцолсон байна. Эх сурвалж: “Зууны мэдээ” сонин 2019.3.27 № 63 (6030)