Ерөнхийлөгч

Ерөнхийлөгчийн зүгээс өнгөрсөн долоо УИХ-д саналаа хүргэсэн.  Тэрээр ээлжит бус чуулганаар зарим хууль хяналтын байгууллагын удирдлагыг чөлөөлөх хүсэлтэй байгаа.  Энэ тухай  Ерөнхийлөгчийн Тамгын газрын дарга З.Энхболд мэдээлэл хийх үеэрээ “Зэвсэгт хүчний жанжин штабын даргад А.Ганбат генералын нэрийг өргөн барьсныг хэлэлцэх нь зүйтэй. АТГ-ын дарга, дэд даргын албан тушаалын хугацаа дууссан учраас Д.Даваа-Очир, Ж.Батсайхан гэдэг хоёр хүнийг нэр дэвшүүлж УИХ руу оруулсан. Мөн Улсын ерөнхий прокурорын орлогч Г.Эрдэнэбатын бүрэн эрхийн хугацаа өнгөрсөн нэгдүгээр сарын 15-нд дууссан. Түүний оронд өөр нэг прокурорын нэрийг дэвшүүлж өргөн барина” гэсэн байна.  Эдгээр асуудлуудыг УИХ-ын тамгын газраас хэлэлцэх асуудлын дараалалд оруулсан гэдгээ ч Ерөнхийлөгчийн Тамгын газарт мэдэгдсэн байна.   Тиймээс шинэ долоо хоногт Ерөнхийлөгчийн зүгээс хууль, хяналтын байгууллагын удирдлага руу чиглэсэн асуудлыг нэлээд явуулах бололтой байна.

Улсын Их Хурал

УИХ-ын даргын  дэргэдэх зөвлөл өнгөрсөн долоо хоногт хуралдаж, Ээлжит бус чуулганыг гуравдугаар сарын 18-аас 29-ний өдрүүдэд хуралдуулахаар болсон. Ээлжит бус чуулганаар хэлэлцэх асуудлыг хэлэлцүүлэгт эцэслэн бэлтгэх үүднээс Төрийн байгуулалтын, Аюулгүй байдал, гадаад бодлогын, Хууль зүйн, Төсвийн, Эдийн засгийн байнгын хороо энэ долоо хоногт хуралдах юм.   Үүний дараа УИХ-ын даргын  дэргэдэх зөвлөл дахин хуралдаж, ээлжит бусаар хэлэлцэх асуудлыг батална.  МАН-ын бүлгийн дарга Д.Тогтохсүрэн татварын багц  хууль зэрэг 5-6 хууль батлах болсон талаар мэдэгдээд байгаа юм.

Засгийн газар

Ирэх долоо хоногт Засгийн газрын тэргүүн  эзгүй байх нь.  Тэрээр НҮБ-ын мандаттай  Өмнөд Судан улс дахь энхийг сахиулах ажиллагаанд оролцож буй цэргийн бие бүрэлдэхүүнтэй уулзахаар  Өмнөд Судан улсыг зорьжээ. Ерөнхий сайдын айлчлалын багт  батлан хамгаалах салбарынхан болон хэвлэл мэдээллийнхэн багтаж байна. Манай улс 2012 оноос тус улсад энхийг сахиулах ажиллагаанд оролцож эхэлсэн төдийгүй 850 хүний бүрэлдэхүүнтэй  найм дахь ээлжийн батальон үүргээ амжилттай гүйцэтгэж байгаа юм.   Өмнө нь Ерөнхийлөгч асан Ц.Элбэгдорж 2013 онд Өмнөд Суданд айлчилж, энхийг сахиулах ажиллагааны явцтай танилцаж байсан юм.