Т.САЙХАН Эрүүгийн цагдаагийн газраас  өчигдөр гүйцэтгэх ажиллагаа явуулж, Худалдаа хөгжлийн банкны ТУЗ-ийн дарга Д.Эрдэнэбилэг,  гүйцэтгэх захирал О.Орхон, “Монголиан коппер корпорейшн” ХХК-ийн гүйцэтгэх захирал Ц.Пүрэвтүвшин нарыг баривчлан саатуулсан. Тэгвэл өнөөдөр /03.06/ баривчлагдсан хүмүүстэй холбоотой элдэв мэдээллүүд цахим орчинд цацагдаж байна.  Тухайлбал,  ХХБ-ны гүйцэтгэх захирал О.Орхон нь  МАХН-ын дарга Н.Энхбаярын эхнэр О.Цолмонгийн төрсөн дүү гэх мэдээллийг нэр бүхий телевиз болон цахим орчинд зарим пейж хуудсаар зохион байгуулалттайгаар түгээж байгааг МАХН-ын даргын гэр бүлээс албан ёсоор няцаасан байна. Энэ талаар МАХН-ын дарга Н.Энхбаярын гэргий О.Цолмон өөрийн цахим хуудсандаа: “Өнгөрсөн засаглалын үеийн гүтгэлэг үргэлжилсээр... Н.Энхбаяр руу, манай гэр бүл рүү сүүлийн арав  гаруй жил дайрч, гүтгэн гүжирдэж ирсэн. Ц.Элбэгдоржийн засаглалын үед үүнийг улстөрийн өрсөлдөгчөө дарах гэж хийж байсныг бүгд мэднэ. Харин өнөөдөр шударга ажиллаж байгаа гэж өөрсдийгөө байнга тодотгож байгаа, ШУДАРГА ЁС ярьж байгаа энэ төр засгийн үед ч бас нөгөө гүтгэлэг гүжирдлэг яагаад үргэлжилж байгаа юм бол????. Эрдэнэтийн 49 хувьтай холбоотойгоор ХХБ-ны удирдлагуудыг баривчилсан чинь тэндээс бас Н.Энхбаярын гэргий О.Цолмонгийн “дүүг” олоод гаргаад  ирсэн илтэд худал мэдээллийг тарааж, өнгөрсөн засаглалын гүтгэлэг, доромжлол үргэлжилж байгаа нь харамсалтай байна. Хэвлэл мэдээллийн хэрэгсэл, сэтгүүлчид түгээж байгаа мэдээ, мэдээллээ нягталж ёс зүйтэй ажиллах нь зүйд нийцнэ гэдгийг хэлэх нь зүйтэй” хэмээн бичсэн байна.