МАХН-аас зохион байгуулсан  “Эх орончдын өдөр-Залуучуудын баяр”  хурлын нээлтэд тус намын дарга, Монгол Улсын гурав дахь Ерөнхийлөгч Н.Энхбаяр товч үг хэлсэн юм. Түүний хэлсэн үгийг бүрэн эхээр нь хүргэж байна. Тэрээр  “Жил бүрийн гуравдугаар сарын 1-нийг Эх орончдын өдөр болгон тэмдэглэдэг уламжлалтай билээ. Энэ өдөр МАХН үүсэн бий болсон өдөр тохиодог. Тэртээ 1921 оны гуравдугаар сарын 1-нд жанжин Д.Сүхбаатар тэргүүтэй хувьсгалчид МАХН-ыг  байгуулж байсан түүхтэй.  Тухайн үеийн залуус ирээдүй хойчийнхоо төлөө санал бодол, хүсэл зорилгоо нэгтгэн  МАХН-ыг үүсгэн байгуулсан. Өнөөдрийн сайн сайхны эхлэл болсон өдрийг хойч үед ч  тэмдэглэн өнгөрүүлэх ёстой гэж миний бие  үзэж  УИХ-ын дарга байхдаа “Эх орончдын өдөр” болгон  тэмдэглэх санал гаргаж   батлуулсан. МАХН гэсэн товчлол бол маш өргөн утга агуулгатай. Зөвхөн хувьсгалт  гэдэг үгийн цаана өөрчлөлт, шинэчлэл, тэмүүлэл, хөгжил гээд олон утга илэрхийлэгдэнэ. Өнөөдөр өөрчлөлт, шинэчлэлийн хувьсгал, залуусаа дэмжих хувьсгал хийх шаардлагатай байна. Монголын нийгэмд хамгийн ихээр гадуурхагдаж, хавчигдаж яваа хүмүүс бол залуу үе. Тэдэнд ажиллах, амьжиргаагаа дээшлүүлэх боломж алга. Ажлын байр байхгүйгээс орон сууцанд орж чадахгүй, орлогогүйгээс их дээд сургуульд сурах, өөрийгөө хөгжүүлэх боломж нь хязгаарлагдсан. Залуус маань эх орондоо амьдрах хүсэлтэй байвч аргагүйн эрхэнд алс холын харь улсад очин ажиллаж, амьдарсаар байгаа. Тиймээс МАХН залуусаа дэмжих бодлого барьж, тэдний сурах орчин, амьдрах орон сууцыг үнэгүй болгоход анхаарлаа хандуулан, бүх тэмцлийг манлайлах болно. Өнөөгийн төр, засаг  залуустаа халгаатай болжээ. Цаашид МАХН залуусаа дэмжиж, хамтран ажиллаж, үргэлж тэдний төлөө явахаа амлаж байна” хэмээн онцлон  тэмдэглэв. Эх сурвалж: www.polit.mn