Ч.ОЛДОХ МАХН-аас “Эх орончдын өдөр”-ийг залуусын баяр болгон тэмдэглэв. Нээлтийн ёслолд үг хэлсэн  тус намын дарга, Монгол Улсын гурав дахь Ерөнхийлөгч  Н.Энхбаяр  залуусын төлөө, тэднийг дэмжихэд МАХН ямагт  манлайлагч  улс төрийн хүчин байна гэдгийг илэрхийлсэн байна. Мөн энэ үеэр  МАХН нийслэлийн Түмтийн даргаараа Э.Эрдэнэжамъяныг сонгосон гэдгээ зарлаж, тамга тэмдгийг нь гардуулжээ. Тэрээр тус хуралд “Шинэ гарц-Шинэ нийслэл” сэдэвт илтгэл тавьсан бөгөөд  “МАХН-ын боловсруулсан Дээд хууль буюу шинэ үндсэн хуулийн төсөлд хоёр  нийслэлтэй байж болох тухай заасан. Өнөөдөр Улаанбаатар хотод ойролцоогоор 400 мянган айл өрх амьдарч байгаагаас 200 шахам мянган айл өрх гэр хороололд амьдарч байна. Хархорин орчимд байгуулагдах шинэ нийслэлд 100 мянган айл өрх амьдрахаар төлөвлөж байна. Энэ нь төсөөлбөл Эрдэнэт хотоос гурав  дахин том хот босно гэсэн үг. Зам нь түгжрэлгүй, сургууль цэцэрлэг нь хүрэлцээтэй байхаар тооцож, амьдрах орчин нь олон улсын жишигт нийцсэн хотыг бий болгоно. Баялаг хувиарлалтын шинэ зарчимаар цоо шинэ ажлын байрууд бий болно. 100 мянган айл бүхий хот барих барилгын ажлыг шинэ бизнесийн зарчимаар хувиарлан өгнө. Хэдхэн том компани, хэн нэгний авилгалын сүлжээгээр дэмжигдсэн монополь компани л тендерт ялж баяждаг, гадны ажиллах хүч оруулж ирж ажиллуулдаг тогтолцоог халж өөрчилнө” хэмээн онцолжээ.  Эх сурвалж: www.polit.mn