Ч.ОЛДОХ МАХН-ын дарга,  Монгол Улсын  гурав дахь Ерөнхийлөгч Н.Энхбаяр  өчигдөр ОУСДС-ийн багш, оюутнуудад Дээд хуулийн талаар лекц уншиж, санал солилцлоо. Тэрээр МАХН-аас боловсруулсан  Дээд хуулийн төсөлд тусгасан дээд боловсрол, эрүүл мэнд, орон сууцыг төрөөс үнэгүй болгох, мөн байгалийн баялгийг ард түмний дундын өмч болгох, иргэдийг баталгаат орлоготой болгох, шударга ёс ыг тогтоохын тулд  хараат бус шүүхийг томилдог биш сонгодог байх талаар ярьж багш, оюутнуудтай санал солилцов. Түүнчлэн парламентыг  хоёр танхимтай болгох, ингэснээр  Ерөнхийлөгч, Засгийн газарт тавих хяналт чангарч, хариуцлага хүлээлгэх боломжийг Дээд  хуулийн төсөлд хэрхэн тусгасныг тайлбарласан юм. МАХН-ын дарга Н.Энхбаяр “Монголчууд өнөөдрийн энэ ядуу зүдүү амьдралаа дуусгах хэрэгтэй. Шударга ёсыг сэргээхийн төлөө хөдөлгөөн өрнүүлэх ёстой. Эдгээр ариун үйл хэргийг эхлүүлэхээр бид хуран цугларч байна. Монгол Улсын  ажилтай, авч байгаа цалин нь амьдралд нь хүрэлцээтэй байх ёстой. Энэ бүхнийг хэрэгжүүлэхийн тулд өнөөгийн төрийн тогтолцоог өөрчлөх хэрэгтэй. Хэсэг хүн, хэдэн намыг муулаад асуудал шийдэгдэхгүй. Тогтолцоог өөрчлөхийн тулд Үндсэн хуулиа өөрчлөх шаардлагатай. Өнөөдрийн бидний амьдрал ямар байна вэ. Энэ нь тогтолцооноос хамаарна. Муу тогтолцоотой байна гэдэг нь тэр хэмжээний Үндсэн хууль байгаагийн илрэл” гэдгийг онцлон тэмдэглэв. Оюутан залуус Үндсэн хуулиа шинэчлэх нь зүйтэй гэж үзэж байлаа. Тэд Дээд хуулийн төслийг дэмжиж байгаагаа илэрхийлэв. Эх сурвалж: “Зууны мэдээ” сонин 2019.2.28 № 41 (6008)