Т.САЙХАН Өнгөрсөн долоо хоногт Ерөнхийлөгч Х.Баттулга ээлжит бус чуулган зарлан хуралдуулах тухай саналаа УИХ-ын дарга Г.Занданшатарт хүргүүлэв.  Төрийн тэргүүн албан бичигтээ   “УИХ-ын нэр бүхий гишүүд  энэ сарын 14-ний өдөр ээлжит бус чуулганыг 14 хоногийн дотор зарлан хуралдуулж, тодорхой асуудлуудыг хэлэлцэн шийдвэрлэх санал, шаардлагыг гаргаад байна. Иймд гишүүдийн санал болгон шаардаж буй асуудлаар ээлжит бус чуулганыг гуравдугаар сарын 1-ний дотор зарлан хуралдуулах саналтай байна” гэжээ.  УИХ-ын Тамгын газраас албан бичгийн хариуг одоохондоо өгөөгүй байгаа.   Гэхдээ энэ долоо хоногт Даргын зөвлөл хуралдаж, ээлжит бус чуулганыг товлон зарлах юм байна. Мөн энэ долоо хоногт удтал гацаанд байсан Хотын даргын асуудал нэг тийш шийдэгдэнэ.  Нийслэл хот сүүлийн дөрвөн сарын хугацаанд даргагүй байлаа.  НИТХ хуралдаж, Хотын даргад С.Мөнхчулууныг дэмжсэн ч Ерөнхий сайд У.Хүрэлсүх батламжилсангүй. Түүгээр ч зогсохгүй  С.Мөнхчулууныг намын дүрэм зөрчсөн хэмээн хөөх шийдвэр гаргасанаа МАН-ын Хяналтын хорооны дарга Д.Батбаатар танилцуулсан.  С.Мөнхчулуунтай хамт НИТХ-ын төлөөлөгч Ц.Сандуй, намын гишүүн А.Ганбаатар нар ч хөөгдлөө.  Хотын даргыг сонгох дараагийн НИТХ-ын хуралдаан энэ сарын 26-нд товлогдсон бөгөөд С.Мөнхчулуун намаас хөөгдсөн ч иргэдээ төлөөлөн энэ  сунгаанд дахин өрсөлдөнө гэдгээ мэдэгдээд байна.  Мөн түүний эсрэг  НИТХ-ын дарга С.Амарсайхан  өрсөлдөнө хэмээн яригдаж байгаа юм.  Ирэх  мягмар гаригт болох НИТХ-аас сонгогдсон Хотын даргыг Ерөнхий сайд хүссэн хүсээгүй батламжлах хуулийн заалттай юм. АТГ-ын  ээлжит хэвлэлийн бага хурал ирэх долоо хоногт болно.  Энэ долоо хоногийн төгсгөлд Ерөнхийлөгч асан  Ц.Элбэгдоржийг  Авлигатай тэмцэх газарт дуудсан гэх мэдээлэл гарсан.  Ерөнхийлөгч асан хуулийн байгууллагын дуудлагыг хүлээн авсан, гутлаа тослон зангиагаа зүүгээд очно гэдгээ цахим хуудастаа мэдэгдэж, олон нийтэд нэлээд PR-дав.  Ерөнхийлөгч Х.Баттулга иргэн хүнийхээ хувьд Ц.Элбэгдоржийг шалгуулах хүсэлтийг Улсын Ерөнхий прокурор М.Энх-Амгаланд хүргүүлсэн байдаг.  Энэ дагуу хуулийн байгууллага шалгалтын эхэлсэн бололтой.  Энэ асуудлаар болон хорих 461 дүгээр ангид хоригдож байсан Б амь намаа алдсан хэргийн талаар албан ёсны тайлбарыг хуулийн байгууллагууд хийх бололтой. Өнгөрсөн лхагва гаригт болсон Засгийн газрын хуралдаанд Сангийн сайд Ч.Хүрэлбаатар тусгай сангуудад хийсэн шалгалтынхаа дүнг танилцуулсан.  Тэгвэл энэ долоо хоногийн Засгийн газрын хуралдаанд татан буугдах болсон сангуудыг танилцуулж, шалгалтыг олон нийтэд ил болгохоор болсон.  Жирийн иргэнийхээ боломжийг хулгайлсан энэ асуудлаас болж, У.Хүрэлсүхийн Засгийн газар хариуц-лага хүлээх ёстой байв. Гэсэн ч ганц хоёр сайдаа явуулаад л өнгөрөв. Мөн прокурорын байгууллагаас ЖДҮ-гээс зээл авсан дөрвөн гишүүнийг түдгэлзүүлэх санал парламентад орж ирсэн ч ангийнх нь нөхөд хамгаалж авч үлдсэн. Түүний дараа УИХ-ын гишүүн Г.Солтан, Б.Ундармаа, Б.Батзориг, Д.Дамба-Очир, Л.Энхболд нарыг яллагдагчаар татсан ч зарим нь ирж мэдүүлэг өгөхгүй, шалгалтад хүндрэл үүсэж байна гэдгийг хуулийн байгууллагаас мэдэгдэж байгаа юм. Тухайлбал, УИХ-ын гишүүн Г.Солтан яллагдагчаар татах дүгнэлттэйгээ ч очиж танилцаагүй байна. Уг нь олон нийт сангуудад хийх шалгалтаас нэн тэргүүнд ЖДҮХС-гаас зээл авсан албан тушаалтнуудад ямар хариуцлага тооцох вэ гэсэн хүлээлттэй байгаа билээ. Эх сурвалж:www.polit.mn