С.САРУУЛ УИХ-ыг тараах шаардлага, хөдөлгөөнийг өнгөрсөн оны гуравдугаар сараас хойш МАХН болон бусад жижиг намууд өрнүүлж эхэлсэн. Оюутолгойн гэрээтэй холбоотойгоор тулган шаардах бичгийг эрх баригчдад хүргүүлэхдээ УИХ-ыг ард түмний эрх ашгаас урвасан гэж үзэж, УИХ-ыг тараах тэмцлийг эхлүүлэх болсноо МАХН удаа дараа мэдэгдэж, хэвлэлийн бага хурал хийж байсан юм. Тэгвэл сүүлийн өдрүүдэд сөрөг хүчин АН болон зарим нэг гишүүд парламентыг тараая гэсэн байр суурийг илэрхийлж байна. АН энэ үйлдлээ лавшруулж УИХ-ыг тараах бичгийг Төрийн ордны самбарт хадаж албан ёсоор тэмцлээ эхлүүлснээ өнөөдөр /2019.01.10/  зарлалаа. Чуулганы үүдэнд байрлуулсан самбарт АН-ын гишүүд гарын үсэг зурсан бол МАН-аас хамгийн түрүүнд Ж.Мөнхбат гишүүн мутараа “хайрлав”. Тэрээр энэ үеэр УИХ-ыг тараах саналыг гаргасан түүний   бланк дээр нийт 16 гишүүн гарын үсгээ зурсан  гэдгийг  хэлсэн юм. Өмнө нь улс төрийн нөхцөл шаардлагаас болж гарын үсэг зурсан зарим нэг гишүүдийн нэрийг түр нууцлаад байсан бол тэдгээр гишүүд энэ удаад чуулганы үүдэн дээрх самбар дээр гарын үсэг зурж Ж.Мөнхбатын бланкнаас “ил гарах” шаардлага үүслээ. Тэмцэл нь үнэн бол тэд удахгүй гарын үсгээ зурах байх. Эх сурвалж: www.polit.mn