С.САРУУЛ Энэ удаагийн парламент улирч буй оныхоо отгон чуулганыг хуралдуулж чадсангүй. Баасан гаригийн (2018.12.28) чуулганы хуралдаанд 76 гишүүнээс 35 нь ирж, бусдыгаа цаг гаруй хүлээсэн ч ирц бүрдээгүйн улмаас тарсан юм. Өмнөх өдөр нь буюу пүрэв гаригт мөн л ирц бүрдэлгүй хойшилсон юм. Ингэснээр энэ онд найм дахь удаагаа хойшилж байгаа нь энэ юм. УИХ-ын дэд дарга Л.Энх-Амгалангийн хэлснээр долоон гишүүн хүндэтгэх шалтгаантай бол 33 гишүүн хурлаа тасалжээ. Уг нь УИХ-ын энэ оны хамгийн сүүлчийн чуулганаар  хоёр асуудал хэлэлцэхээр төлөвлөөд байжээ.  Ерөнхийлөгч УИХ-д Үндэсний Аюулгүй байдлын талаар мэдээлэл хийх хүсэлтээ ирүүлснийг өнгөрсөн долоо хоногт УИХ-ын даргын дэргэдэх зөвлөлийн хурлаар хэлэлцээд энэ долоо хоногийн чуулганы нэгдсэн хуралдаанаар хэлэлцэх асуудлын дараалалд оруулсан бол Улсын Их Хурлын гишүүн Д.Эрдэнэбатаас Ерөнхий сайдад хандан “Ханшийн өсөлттэй холбогдуулж хийсэн интервенци, мөнгөний болон төсвийн бодлогын уялдаа, Засгийн газрын өрийн талаар” тавьсан асуулгын хариуг сонсохоор төлөвлөсөн байна. Чуулганы үеэр УИХ-ын дэд дарга Л.Энх-Амгалан “ Ерөнхийлөгчөөс мэдээлэл хийх хүсэлт ирүүлсний дагуу намын бүлгүүдийн дарга нарт албан бичиг хүргүүлсэн. Чуулганы ирц бүрдүүлэх тухай дээрх албан бичигт, Үндэсний аюулгүй байдлын зөвлөлөөс  ирүүлсэн албан бичигт  Ерөнхийлөгч, Үндэсний аюулгүй байдлын зөвлөлийн Тэргүүн УИХ-д энэ сарын 21-ний өдөр мэдээлэл хийх хуваарьтай байсан билээ. Гэвч УИХ-ын ирц бүрдээгүй учир  Ерөнхийлөгч, Үндэсний аюулгүй байдлын зөвлөлийн Тэргүүн мэдээлэл хийж чадаагүй. Иймд  27, 28-ны аль нэг өдөр УИХ-ын нэгдсэн хуралдаанд  Ерөнхийлөгч, Үндэсний аюулгүй байдлын талаар мэдээлэл хийх товыг тогтоон мэдэгдэнэ үү гэсэн байна. Иймд УИХ-ын даргын дэргэдэх зөвлөлөөс баталсан хуваарийн дагуу УИХ-ын 2018 оны 12 дугаар сарын 27, 28-ны өдрийн нэгдсэн хуралдаанд гишүүдээ бүрэн хамруулж ирц бүрдүүлэхийг хүсье" гэсэн албан бичиг хүргүүлсэн гээд өнөөдрийн хуралдаанд хүрэлцэн ирсэн УИХ дахь МАН-ын бүлгийн дарга Д.Тогтохсүрэнг намын бүлгийн гишүүдээ хуралдааны танхимд ирүүлж, ирц бүрдүүлэхийг хүсэв. Гэсэн ч ирц бүрдээгүй учраас хуралдаан даргалагч, УИХ-ын дэд дарга Л.Энх-Амгалан, товлосон цагаас хойш нэг цаг гаруй хүлээсэн ч хуралдааны ирц бүрдээгүй учир хуралдах боломжгүй болсныг мэдэгдээд иргэд, сонгогчдоосоо уучлал хүсээд гишүүдийг тараасан юм. Ийнхүү энэ удаагийн парламент отгон чуулганаа хуралдуулж, Ерөнхийлөгчийн хаалттай мэдээллийг сонсох нөхцөл боломжийг бүрдүүлж өгсөнгүй. Эх сурвалж: www.polit.mn