Ч.Олдох Хотын даргын сунгаа, шинэ жилийн баярын сүрд дарагдсан мэт  байгаа ч эрх баригч намын дотоодод хүчтэй өрнөж байна. Эртнээс нэр нь яригдсан эрхмүүд бол МАН-ын генсек Д.Амарбаясгалан, “Эрдэнэс Тавантолгой”-нд дэд захирал О.Одбаяр,  Хотын дарга асан Ц.Батбаяр, ОХУ-ын Эрхүү хотод Ерөнхий консулаар сууж буй  Л.Амарсанаа, “Эрдэнэс Оюу Толгой”-н гүйцэтгэх захирал Б.Мөнхбаатар нар байв. Сүүлийн үед Хотынхон дотроосоо даргаа сонгоё гэдэгт  нэгдсэн, нэр тодруулж  саналаа багцалж байгаа гэсэн мэдээлэл байгаа. Хот дотроос  бол НИТХ-ын дарга С.Амарсайхан, Хотын даргын орлогч П.Баярхүү, Ж.Батбаясгалан, Ш.Анхмаа, НИТХ дахь МАН-ын бүлгийн дарга С.Мөнхчулуун нарын нэр дуулдаж буй. Мэдээлэлд ойр эх сурвалжуудын зүгээс  Б.Мөнхбаатар, С.Амарсайхан хоёр өрсөлдөж, аль нэг нь Хотын дарга болно  хэмээн ярьж байна. Гэхдээ маргааш болох НИТХ-ын хурал хойшилж магадгүйг зарим эх сурвалж хэллээ. Мөн хотын даргыг сонгох НИТХ-ын хуралд заалнаас хэн нэг “Нууц ноёнтон” нэр дэвшиж ч магадгүй гэв. Энэ үнэн бол Хотын даргыг сонгох асуудал оны дараа хэлэлцэгдэж  болзошгүй юм. Эх  сурвалж: www.polit.mn