С.САРУУЛ Монгол Улсын 27 дахь Ерөнхий сайдаар ажиллаж байсан Н.Алтанхуяг Монгол Улсыг хөгжүүлэх, хууль хяналтын байгууллагын шударга бусын хонгилыг нураахын тулд  “Нэгдсэн Монгол” хөдөлгөөн байгуулснаа мэдэгдлээ. “Зууны мэдээ” сонины Үндэсний мэдээллийн төвд хийсэн хэвлэлийн хурлын үеэр түүний хэлсэн үгнээс онцлох эшлэлүүдийг хүргэж байна.  

-Байгалийн баялгийг ард нийтийн өмч болгоё.

 

-Шударга бусыг үгүй хийх эрс шинэчлэлийг Их хурлыг тараахаас эхлүүлье.

 

-Төрийн албыг 60 тэрбумаар наймаалцдаг 60 тэрбумтнуудыг шударга хууль шүүхийн өмнө зогсоомоор байна.

 

-Хувь хүн биш хууль засагладаг тогтолцоог сэргээе.

 

- Авлигачин төсөв зохиодог байдлыг үгүй хийхийн төлөө бүх шатандаа тэмцэх шаардлагатай.

 

-Авлигачдын мөнгийг иргэдийг орон сууцжуулахад зарцуулж, чинээлэг дундаж давхаргыг бодлогоор дэмжиж босгоё.

 

-Эдийн засгийн ардчилал бий болгохын тулд бүхий л салбарт хоршооллын сүлжээнүүдийг бий болгоё.

 

-Улс төрийн нам, ард түмэн ч тэр талцаж хэрэлдэхээ зогсоож, улс орноо хөгжүүлэх гарц шийдэл ярих цаг болсон.

 

-Шударга бусын хонгилыг устгахын тулд “Нэгдмэл Монгол” хөдөлгөөнд нэгдэхийг уриалж байна. Харин нам дагасан шударга бус хүмүүс холхон байгаарай.

 

-Аливааг хийе гэвэл арга нь олддог. Хийхгүй гэвэл шалтаг олддог гэдгийг төрийн гурван өндөрлөг болоод гурван сая иргэнд хандаж хэлмээр байна.

 

-МАН, АН аль нь ч байсан хөлөө жийлцэхээ больж гарц шийдэл ярих хэрэгтэй. Түүнээс сонгуульд ялна гэсэн амиа бодсон сэтгэлгээгээ болих ёстой.

 

-Газрын доорх баялаг ард түмэнд бус нам байгуулахад зарцуулагдаж байна.

 

-Эх оронд хэрэгтэй гэвэл өлсөнө, тэмцэнэ, цуглана. Шинэчлэл хийж чадна гэдэгтээ итгэлтэй байна.

  Эх сурвалж: www.polit.mn