Т.САЙХАН Явах хүнээр ачаа бүү ачуул гэдэг үг бий.  Тэгвэл төрийн өндөр албанд түр орлон гүйцэтгэгч олноор бий боллоо.  Эрх баригч намын байгаа байдал тал талд ийм байдал үүсгэж байна. ХХААХҮ-ийн сайдгүй өвөл цагтай золгоход хүргэв.  Газар тариалан, мал аж ахуйн салбарт гол бодлогыг атгаж явах учиртай энэ яам сайдгүй, тэр битгий хэл Төрийн нарийн бичгийн даргагүй байгаа.   Уг нь өдийд тус яаман дээр жинхэнэ ажил буцалж байх учиртай сан.  ХХААХҮ-ийн сайд асан Б.Батзориг ЖДҮХС-гаас зээл авсан хэргээр үүрэгт ажлаасаа чөлөөлөгдсөн.  Төрийн нарийн бичгийн дарга Д.Энхбат нь мөн зээлтэй холбоотой асуудлаар  хуулийн байгууллагад саатуулагдаад байгаа.    Тэдний оронд сайдыг томилсонгүй.  Дэд сайд Ж.Сауле нь түр орлон гүйцэтгэгч маягаар яамны ажлыг авч явна. Ерөнхийлөгч Х.Баттулга зарлиг гаргаж, ЗХЖШ-ын дарга Д.Давааг үүрэгт ажлаас нь чөлөөлсөн. Түүнээс хойш бараг нэг сарын хугацаа өнгөрлөө. Улс орны аюулгүй байдлыг  хангах, тусгай чиг үүрэг бүхий хүчний байгууллага одоог хүртэл удирдлагагүй, түр орлон гүйцэтгэгчтэй байна. БСШУС-ын сайд Ц.Цогзолмаа Засгийн тэргүүнээсээ сайдаас огцрох визээ авчихсан сууж байна.  Ц.Цогзолмаа сайдыг огцруулах асуудал мөн л УИХ дээр гацчихсан байгаа.  Салбарын сайдын явах  нь тодорхой болсон учраас   тэр түр орлон гүйцэтгэгч маягтай ажиллаж байна. Нийслэлийн Засаг дарга С.Батболд өөрийн хүсэлтээр ажлаа өгсөн.  Засаг даргын түр орлон гүйцэтгэгчээр Ж.Батбаясгалан ажиллаж байна.  Нийслэлд агаарын бохирдол, төсөв санхүү, түгжрэл гээд олон асуудал бий.  Яг энэ цаг үед түр орлон гүйцэтгэгч юу хийж чадах вэ. Түр орлон гүйцэтгэгчтэй дараагийн яам ЗТХЯ.  Өнгөрсөн аравдугаар сарын 5-нд ЗТХ-ийн сайдаар УИХ-ын гишүүн Я.Содбаатарыг томиллоо. Гэсэн ч  тэр сар гаруйн хугацаанд л сайдаар ажиллах хувьтай байжээ. Бараг Монголын түүхэнд хамгийн богино хугацаанд сайд хийсэн хүн нь Я.Содбаатар болж байх шиг байна. Тэр энэ сарын 3-нд үүрэгт ажлаасаа чөлөөлөгдөх өргөдлөө өгчихөөд байна. Я.Содбаатар  ЖДҮХС-гаас зээл авсан нь олон нийтэд ил болоод байгаа билээ. Одоо тэрээр өргөдлөө өгсөн түр орлон гүйцэтгэгчээр ажиллаж байна. Эх сурвалж:www.polit.mn