С.САРУУЛ Хуульзүй дотоод хэргийн яамны ТНБД Г.Баясгаланг өнгөрсөн наймдугаар сарын 1-д ЗГХЭГ-ын дэд даргаар томилсон. Төрийн албаны зөвлөлөөс түүний оронд сонгон шалгаруулалт зарласан ч ажлын байранд тавигдах шалгуур нь хэт нэг талыг барьсан зэрэг хэл ам гараад байсан юм. Тэгвэл Г.Баясгаланг ажлаа өгснөөс хойш  гурван сарын хугацаанд эзгүй байсан түүний орны хүн улс төрийн хүрээнд нэг их анхаарал татаж, дуулиан болсонгүй сэмхэн томилогдлоо. Өөрөөр хэлбэл, өмнө нь Хуульзүй дотоод хэргийн яамны Төрийн захиргаа удирдлагын газрын даргаар ажиллаж, Г.Баясгаланг түр орлож байсан Г.Билгүүнийг Засгийн газраас өнгөрсөн долоо хоногт жинхэлж ТНБД-аар томиллоо. Түүнийг Төрийн албаны зөвлөлөөс зохион байгуулсан сонгон шалгаруулалтын дүн болон  зөвлөлийн дүгнэлтээр санал болгосноор Засгийн газрын энэ сарын 14-ний өдрийн ээлжит хуралдаанаар томилгоо хийгдсэн юм. Ийнхүү Хуульзүйн салбарын “гал тогоог” барих хариуцлагатай үүрэг хүлээсэн Г.Билгүүний талаар товчхон мэдээлэл хүргэе. Гэхдээ түүнийг хууль мэргэжилтэй гэснээс өөрөөр анхан шатны CV-г нь яамны цахим  хуудсанд байршуулаагүй байна. Харин Хуульзүй дотоод хэргийн сайд Ц.Нямдоржийн Засгийн газарт танилцуулснаар Г.Билгүүн нь төрийн албанд 15 дахь жилдээ ажиллаж байгаа аж. Ингэхдээ Хууль зүй, дотоод хэргийн яаманд голчлон ажилласны дотор мэргэжилтэн, ахлах мэргэжилтэн, хэлтсийн дарга, газрын даргын албан тушаал хашиж хамгийн сүүлд гэхэд Төрийн захиргааны удирдлагын газрын даргаар ажиллаж ТНБД-ын суудлыг орлож байсан. Мөн төрийн албанд ажиллах хугацаандаа  3-4 жилийн өмнө Улсын бүртгэлийн ерөнхий газрын дэд даргаар ажиллаж байсан. Мөн 2013 онд Архивын ерөнхий газрын бүтцийг шинэчлэхэд Архивын ерөнхий газрын дэд даргаар томилогдон ажиллаж байсан юм. Хэдийгээр түүнийг төрийн албанд цөөнгүй жил ажилласан тэр дундаа хуульзүйн салбарт доод шатнаас нь эхлэн ажилласан гэж харж болох ч одоохондоо хэр зэрэг төрийн хүн гэдгийг таньж амжаагүй байна. Эх сурвалж: www.polit.mn