Т.БАТСАЙХАН УИХ-ын чуулганы өчигдрийн хуралдаанаар Ерөнхий сайд У.Хүрэлсүхийг огцруулах асуудлыг хэлэлцэх байв. Гэсэн ч өглөөний 10:00 цагт эхлээд завсарлалаа. Гишүүдийн ирц 50.7 хувьтай байв. УИХ-ын гишүүн С.Бямбацогт Ёс зүйн дэд хороо хуралдаж, ЖДҮХС-гаас зээл авсан гишүүдийн асуудлыг хэлэлцэх ёстой. Тэр хүртэл  хуралдааныг завсарлуулах санал гаргасан. Үүнийг УИХ-ын дарга М.Энхболд зөвшөөрлөө. Ийнхүү ирцгүй, Засгийн газрыг огцруулах эс огцруулах кноп тоолсон  улс төр төрийн ордонд үргэлжлэв.   Л.ОЮУН-ЭРДЭНЭ: МАНАН БҮЛЭГЛЭЛ НУРАХ ГЭЖ БАЙНА /2018.11.29 11:30 ЦАГТ/ Чуулган завсарласны дараа УИХ-ын гишүүн Л.Оюун-Эрдэнэ мэдээлэл хийлээ.  Тэрээр  “Монголын парламентын 27 жилийн түүхэнд болж байгаагүй үйл явдал боллоо. УИХ-ын дарга  хуралдаанаа хаяад гарчихлаа. УИХ гэдэг бол М.Энхболд гэдэг хүн биш. Энэ үйл явцаас Монгол Улсын парламент хуулийн дагуу биш хувь хүнд тохируулж ажиллаж байгааг харж болно. МАНАН гэх бүлэглэлийн “тоглоом” нурах гээд байгаа учраас хууль хяналтын байгууллагууд хамгаалахаар бөөнөөрөө ажиллаж байна. УИХ-ын гишүүдийн гэр бүлийг баривчлах ажиллагаа явуулж байна” гэлээ. С.Чинзориг: ЖДҮХС-ГААС ЗЭЭЛ АВААГҮЙ  /2018.11.29 11:00 ЦАГТ/ УИХ-ын гишүүн, Хөдөлмөр, нийгмийн хамгааллын сайд С.Чинзориг ЖДҮХС-гаас зээл авсан гэх асуудалд тайлбар өглөө. Тэрээр “Сүүлийн үед Засгийн газрыг огцруулах асуудал яригдаж байгаатай холбогдуулан гишүүд бие биеэ ор үндэслэлгүй гүтгэх явдал газар авч байна. Надтай холбогдуулан “Бээвэр” компаниар дамжуулж, ЖДҮХС-гаас  300 сая төгрөгийн зээл авчээ гэдэг мэдээлэл гарлаа. “Бээвэр”компанитай  ямар ч холбоо хамааралгүй. Тиймээс энэ асуудлыг гаргасан УИХ-ын гишүүд надаас болон манай тойргийн сонгогчдоос уучлал гуйхыг  шаардаж байна” гэлээ. УИХ-ЫН ДАРГА М.ЭНХБОЛД ХУУЛИЙН БАЙГУУЛЛАГУУДАД ХАНДАВ /2018.11.29 11:30 ЦАГТ/ УИХ-ын дарга М.Энхболд   Ерөнхий прокурор, Тагнуулын ерөнхий газар, Авлигатай тэмцэх газар, Цагдаагийн ерөнхий газарт ханджээ.  Энэ талаар УИХ-ын даргын Хууль зүйн бодлогын зөвлөх Р.Болд “УИХ-ын гишүүн Л.Оюун-Эрдэнэ хууль хяналтын байгууллагууд М.Энхболд гэдэг хүнийг хамгаалахаар ажиллаж байна. УИХ-ын гишүүдийн гэр бүлийг баривчлах ажиллагаа явуулж байна гэсэн утга бүхий мэдэгдэл хийж хэвлэл мэдээллийн хэрэгслээр нийтэд түгээлээ. УИХ-ын гишүүн Л.Оюун-Эрдэнийн дээрх мэдэгдэл үнэн эсэх, УИХ-ын гишүүдийн гэр бүлийг баривчлах ямар нэгэн ажиллагаа явуулсан эсэх талаар шалгаж хариу ирүүлнэ үү”  гэсэн хүсэлтийг хуулийн байгууллагад явуулсан байдаг. ЁС ЗҮЙН ДЭД ХОРООНЫ ХУРАЛДААНЫ ИРЦ ХҮРСЭНГҮЙ /2018.11.29 14:30 ЦАГТ/ УИХ-ын Ёс зүйн дэд хороо хуралдахаар чуул­ганыг түр завсарлуулсан ч ирц бүрдээгүй учир 14:30 цаг хүртэл хойшилсон.  Гэсэн ч үдээс хойш мөн л гишүүдийн ирц хүрсэнгүй. Тус дэд хорооны даргаар УИХ-ын гишүүн С.Бям­ба­цогт ажилладаг. Бүрэл­дэхүүнд Х.Баделхан, Д.Лүндээ­жанцан, Б.Наран­­хүү, Л.Мөнх­баатар, Г.Тэмүүлэн, Д.Сарангэрэл, М.Энхболд, Д.Эрдэнэбат нар багтдаг байна. ЕРӨНХИЙ САЙД У.ХҮРЭЛСҮХ ЦЭЦЭД ХАНДЛАА /2018.11.29 15:00 ЦАГТ/ Ерөнхий сайд У.Хүрэлсүх УИХ-ын дарга М.Энхболдыг Үндсэн хууль зөрчсөн гэж үзээд, Цэцэд өгчээ. Энэ талаарх байр сууриа цахим хуудсаар дамжуулан илэрхийлсэн юм. АТГ: УЛС ТӨРИЙН ЯВУУРГҮЙ АЖИЛЛАГААНДАА ТАТАН ОРУУЛАХГҮЙ БАЙХЫГ САНУУЛЖ БАЙНА /2018.11.29 17:00/ АТГ-аас цаг үеийн асуудлаар мэдээлэл хийсэн юм.  Тамгын хэлтсийн дарга, Эрхэлсэн комиссар З.Баасанням “ Улс төрчид улс төрийн үйл ажиллагаа явуулахдаа хуулийн байгууллагыг гүтгэн татан оруулдаг байдал удаа дараа гарч байна. Цаашид энэ улс төрийн явуургүй ажиллагаандаа татан оруулахгүй байхыг сануулж байна. АТГ-ын үйл ажиллагаанд хэн нэгэн хүн хөндлөнгөөс оролцдоггүй. Тиймээс цаашид улс төрийн явуургүй үйл ажиллагаандаа АТГ-ын нэрийг оролцуулахгүй байхыг шаардаж байна” гэсэн юм.   Мөн энэ үеэр УИХ гишүүн Л.Оюун-Эрдэнийн хамаарал бүхий компани ЖДҮХС-аас зээл авсан асуудал шалгагдаж байгаа гэсэн байдаг.  Энэ үйл явдалтай холбогдуулан орой 18.30 минутад Л.Оюун-Эрдэнэ дахин мэдээлэл хийсэн.  Тэрээр “Би АТГ-ын мэдээлэлд баярлаж байна.   Хэт улс төржсөн үйл явдал болж байна.   Миний хамаарал бүхий нэг ч компани зээл аваагүй. Гишүүдийг дарамталж байгаа нь үнэн” гэсэн юм. “УИХ-ЫН ҮЙЛ АЖИЛЛАГАА СААТААД БАЙНА” /2018.11.29 15:00 ЦАГТ/ УИХ-ын чуулганы үдээс хойшхи хуралдаан 15:00 цагт эхлэх байсан ч УИХ-ын дарга М.Энхболд орж ирсэнгүй. УИХ-ын гишүүн Г.Занданшатар  “Гишүүдийн ирц хангалттай байна.  Гэсэн ч УИХ дарга алга болчихлоо. Төрийн ордонд УИХ-ын үйл ажиллагаа тасралтгүй явагдах учиртай. Гэтэл УИХ-ын үйл ажиллагаа саатаад байна” гэсэн юм. Ц.ЦОЛМОН: ЁС ЗҮЙН ДЭД ХОРОО ХУРАЛДСАНЫ ДАРАА ЧУУЛГАН ХУРАЛДАНА /2018.11.29 16:00 ЦАГТ/ УИХ-ын Тамгын газрын Ерөнхий нарийн бичгийн дарга Ц.Цолмон мэдээлэл хийлээ.  Тэрээр “УИХ-ын чуулганы хуралдаан эхэлсний дараа Ёс зүйн дэд хороог хуралдуулах хүсэлт тавьсан. Ёс зүйн дэд хороо хуралдахаар хүлээж байна. Ирц нь бүрдэхгүй байна. Ёс зүйн дэд хороо хуралдсаны дараа чуулган хуралдана. УИХ-ын дарга өрөөндөө байгаа. Ёс зүйн дэд хорооны хуралд оролцохоор гишүүний хувиар картаа хийчихээд хүлээж байгаа” гэсэн юм. Ийнхүү өчигдөр парламентад ямар ч хуралдаан болсонгүй.   Засгийг огцруулах, авч үлдэх өрсөлдөөн улс төрийн хөшигний ард өрнөв.  Бүлэглэл кнопоо тоолж, бүх асуудлыг гацааж өнжлөө. Эх сурвалж: “Зууны мэдээ” сонин