Л.БЭХ Засгийн газрыг огцруулах уу, үргэлжлүүлэн ажиллуулах уу гэдэг шийдвэрийг УИХ-ын чуулганы нэгдсэн хуралдаанаар  маргааш  хэлэлцэж эцсийн шийдвэрийг гаргана. Гэхдээ танхимыг огцруулах санал гаргаад байгаа УИХ дахь МАН-ын бүлгийн 27 гишүүнээс  “Жижиг, дунд үйлдвэрлэлийг хөгжүүлэх сан/ЖДҮХС/-тай нэр холбогдсон УИХ-ын болон  Засгийн газрын гишүүдийг У.Хүрэлсүхийн танхимыг огцруулах, эсэх асуудлаар санал хураахад оролцуулахгүй ёсгүй” гэж мэдэгдэв. Жижиг дунд үйлдвэрлэл эрхлэгчдэд очих ёстой мөнгийг тэрбум, тэрбумаар нь  тэнцүү хуваагаад хүртчихсэн ЖДҮ-чид санал хураалтад оролцож, Засгийг огцруулахгүй гэсэн кноп дарвал  шившиг болно. Иймд У.Хүрэлсүхийн талынхан буюу 37-гоос, М.Энхболдын талынхан буюу 27-гоос хэд нь ЖДҮХС-тай нэр холбогдоод байна вэ гэдгийг ч хэвлэлүүд нэрлэжээ.  Одоогоор тодорхой болоод байгаа нэрсийн жагсаалтыг  тоймлон хүргэе.

ЗАСГИЙГ ОГЦРУУЛАХ 4 ЖДҮ-ЧИН

Б.УНДАРМАА Хувьдаа банк болон банк бус санхүүгийн байгууллагатай тэрээр МЭИК компаниараа дамжуулан ЖДҮХС-гаас 700 сая төгрөгийн зээл авчээ. Хамаарал бүхий компанийг нь хуулийн байгууллага шалгаж эхэлсэн тухай мэдээлэл ч цацагдаад байна. Тэрээр У.Хүрэлсүхийн танхимд хариуцлага тооцох ёстой гэсэн байр суурь барьж байгаа.УИХ-ын 2016 оны сонгуульд Сонгинохайрхан дүүрэгт нэр дэвшин сонгогдсон. Н.ОЮУНДАРЬ Түүний хамаарал бүхий “Рэд Стар Клуб” ХХК нь ЖДҮХС-гаас 800 сая төгрөгийн зээл авсан. Уг компани нь хүүгийнх нэр дээр бүртгэлтэй байдаг. Хамаарал бүхий компани нь ЖДҮХС-гаас зээл авсан тухай асуудал хөндөгдөж, сэтгүүлчид түүнээс уучлал гуйх эсэхийг лавлахад “Уучлал гуйх шаардлагагүй” гэж  байв. Гэвч намын дарга нь ЖДҮХС-гаас авсан зээлээ төлж, уучлал гуйхгүй бол хариуцлага яригдана гэснээр олон нийтээс уучлал гуйсан юм. УИХ-ын 2016 оны сонгуульд Сэлэнгэ аймгаас сонгогдсон. Засгийн газрыг огцруулахыг дэмжиж байгаа 27 гишүүний нэг юм. Б.САРАНЧИМЭГ Төрсөн дүү Б.Одончимэгийнхээ “Сингапурхэльткейр сентр” ХХК-д ЖДҮХС-гаас 800 сая төгрөгийн зээл авч өгсөн гэх дуулианд нэр холбогдсон. Б.Саранчимэг гишүүн энэ талаар тайлбар хийгээгүй. Харин УИХ-ын гишүүн Б.Наранхүү “Дүүгийнхээ ЖДҮХС-гаас авсан зээлийг нь төлөөд, нэмээд хоёр  тэрбумыг өгнө” гэсэн  юм. Эгч, дүүс Засгийн газрыг огцруулах байр суурь барьж байна. УИХ-ын гишүүн Б.Наранхүү Дундговь аймгаас УИХ-д хоёр дахь удаагаа сонгогдон ажиллаж байгаа бол Б.Саранчимэг УИХ-ын 2016 оны сонгуульд Баянзүрх дүүргээс сонгогдсон. Г.ТЭМҮҮЛЭН “Эрдэнэт” үйлдвэрийн экс захирал Ч.Ганзоригийн хүү, УИХ-ын гишүүн Г.Тэмүүлэнгийн хувьд ээж  Д.Дэнсмаа нь “Спа цогцолбор”-тоо ЖДҮХС-гаас 700 сая төгрөгийн зээл авсан баримт дэлгэгдээд байгаа. Засгийн газрыг огцруулахыг дэмжиж гарын үсэг зурсан 27-н гишүүний нэг. УИХ-ын 2016 оны сонгуульд Архангай аймгаас  сонгогдсон.

ЗАСГИЙГ ХАМГААЛЖ БАЙГАА  12 ЖДҮ-ЧИН

Ж.ЭНХБАЯР 1.9 тэрбум “Газар Агро”, “Газар Буудай” компанидаа ЖДҮХС-гаас 1.9 тэрбум төгрөгийн зээл авсан. Жилийн гурван хувийн хүүтэй зээл авсан нь илчлэгдэнгүүт буцаан төлсөн. Гэхдээ жилийн гурван хувийн хүүтэй авсан зээлээ “Газар Капитал”-аараа дамжуулан 36 хувийн хүүтэйгээр бусдад зээлдүүлж, мөнгө угаасан байж болзошгүй гэх хардлагад өртөөд байгаа. Тэрээр УИХ-д гурав дахь удаагаа сонгогдон ажиллаж байна.УИХ-ын 2016 оны сонгуульд Баянзүрх дүүргээс сонгогдсон юм. Засгийн газар тогтвортой ажиллах ёстой гэсэн байр суурь барьж байна. Н.УЧРАЛ УИХ-ын гишүүн Н.Учралын аав Н.Ням-Осорын “Хүннү” групп нь ЖДҮХС-гаас 950 сая төгрөгийн зээл авсан. Энэ  мэдээлэл олон нийтэд ил болсны дараа буцаан төлөхөө мэдэгдсэн. Тэрээр Засгийн газрыг хамгаалж байгаа 37 гишүүний нэг юм. УИХ-ын 2016 оны сонгуульд Сонгинохайрхан дүүрэгт өрсөлдөж, УИХ-д сонгогдсон. Г.СОЛТАН -950 сая “Монгол шаазан” компани нь 950 сая төгрөгийн зээлийг ЖДҮХС-гаас авсан. Олон жилийн өмнө уг компанийг удирдаж байсан тул надад хамааралгүй гэдэг тайлбарыг хийж, уучлал гуйхгүй гэдгээ мэдэгдсэн. УИХ-ын 2016 оны сонгуульд өрсөлдөж, Баян-Өлгий аймгаас сонгогдсон. ЖДҮ тараасан засгийг огцруулахгүй гэж ЖДҮчин гишүүн үзэж буй. Х.БОЛОРЧУЛУУН “Дорнод гурил” компани нь ЖДҮХС-гаас 950 сая төгрөгийн зээл авсан. Үйлдвэрлэл эрхлэхэд зээл авахаас өөр арга байдаггүй. Тийм учраас тус сангаас зээл авсан гэдгээ ил тод хэлсэн. УИХ-д Дорнод аймгаас хоёр дахь удаагаа сонгогдон ажиллаж байна. Тэрээр У.Хүрэлсүхийн танхимыг огцруулахгүй гэж гарын үсэг зурсан А.СҮХБАТ “Түгээмэл түмэн хишиг” ХХК нь ЖДҮХС-гаас 800 сая төгрөгийн зээл авсан баримт ил болоод байгаа. УИХ-ын 2016 оны сонгуульд Төв аймагт нэр дэвшин, УИХ-ын гишүүн болсон. Я.СОДБААТАР - “Эпато Анарваан” ХХК, “Ти Эс Эм” ХХК нь хоёр  тэрбумын зээлийг ЖДҮХС-гаас авсныг мэдэлгүй явж байсан сайд бол Зам тээврийн хөгжлийн сайд Я.Содбаатар юм. Тэрээр сэтгүүлчдэд “Манай эхнэрийн найзуудтайгаа нийлж байгуулсан компанийн нэр холбогдоод байгаа” гэсэн. Засгийн газрыг огцруулах санал гаргасан 27 гишүүн хариуцлага яригдах ёстой танхимын гишүүний нэг нь Я.Содбаатар гэж мэдэгдэх болсон. Харин Ерөнхий сайд У.Хүрэлсүх “Энэ асуудал хууль хяналтын байгууллагад шалгагдаж байгаа. Буруутай нь тогтоогдвол хариуцлага тооцох шиг амархан зүйл үгүй. Өөрт нь ч энэ тухай хэлсэн” гэх тайлбар хийж буй. Тэрээр Өвөрхангай аймгаас УИХ-д хоёр дахь удаагаа сонгогдон ажиллаж байна. Б.БАТЗОРИГ -“Тээвэр Ачлал” ХК, “Наму дэвжих” ХХК-даа гурван  тэрбум төгрөгийн зээл ЖДҮХС-гаас авсан, мөн УИХ, Засгийн газрын гишүүдэд зээл олгосон гэх үндэслэлээр Хүнс хөдөө аж, ахуй, хөнгөн үйлдвэрийн сайдаас чөлөөлөгдсөн. Хотын фракцад харьяалагдаж явсан ч одоо Засгийн газар тогтвортой ажиллах ёстой гэх байр суурь барьж байна. Н.ЦЭРЭНБАТ -Байгаль орчин, аялал жуулчлалын сайд Н.Цэрэнбат Баян таван тэс ХХК-д 250 сая, Баруун загвар ХХК-д 160 сая төгрөгийн зээлийг ЖДҮХС-гаас авсан гэдэг дуулианд нэр холбогдоод байна. Увс аймгаас УИХ-д сонгогдсон тэрбээр У.Хүрэлсүхийн танхимын сайд нараас ЖДҮХС-тай нэр холбогдсон гурав дахь гишүүн нь болоод байна. О.БАТНАСАН - “Топ кондитер” нь ЖДҮХС-гаас 950 сая төгрөгийн зээл авсан. Ховд аймгаас УИХ-д анх удаа сонгогдон ажиллаж байгаа тэрбээр Засгийн газар тогтвортой ажиллах ёстой гэх байр суурь барьж буй. Х.НЯМБААТАР УИХ-ын гишүүн Х.Нямбаатар нь “Өгөөдэй Ази” ХХК-тай хамтран 950 сая төгрөгийн зээлийг ЖДҮХС-гаас авсан тухай мэдээллийг цахим сайтууд гаргаж тавиад байна. Мөн нийгмийн сүлжээнд энэ тухай мэдээлэл цацагдаад байгаа юм. УИХ-ын 2016 оны сонгуульд Сонгинохайрхан дүүрэгт өрсөлдөж, УИХ-д сонгогдсон. Л.ОЮУН-ЭРДЭНЭ “Жаргал Харвэрст” гэх компаниар дамжуулан 950 сая төгрөгийн зээл авсан тухай нийгмийн сүлжээнд мэдээлж байна. Энэ зээлийг УИХ-ын гишүүн Л.Оюун-Эрдэнэ “Херо”-гийн захирал Б.Баатартай хамтран авсан гэсэн баримт олон нийтийн сүлжээнд дэлгэгдсэн. УИХ-ын 2016 оны сонгуульд Хэнтий аймагт өрсөлдөн, сонгогдсон. Тэрээр Засгийн газрыг хамгаалж байгаа гишүүдийн нэг бөгөөд УИХ-ын дарга М.Энхболдыг 60 тэрбумын асуудлаар нь огцрохыг шаардаж, хаврын чуулганаас эхлэн асуудал тавьж байгаа. М.ОЮУНЧИМЭГ УИХ-ын Өргөдлийн байнгын хорооны дарга М.Оюунчимэг ЖДҮХС-гаас зээл авсан нь тогтоогдсон гэж УИХ-ын дэд дарга Л.Энх-Амгалан, УИХ-ын гишүүн С.Бямбацогт нар өчигдөр мэдэгдсэн. Харин УИХ-ын гишүүн М.Оюун-чимэг “Энэ тухай мэдэхгүй. ЖДҮХС-гаас зээл аваагүй дээ” гэх тайлбар хийгээд буй. УИХ-ын 2016 оны сонгуульд Чингэлтэй дүүрэгт өрсөлдөж, сонгогдсон. Эх сурвалж: www.polit.mn