Т.САЙХАН Аюулгүй байдал, гадаад бодлогын байнгын хорооны хурлаар ЖДҮХС-аас зээл авсан төрийн өндөр албан тушаалтнуудын асуудлыг хэлэлцэх байсан ч хойшлогдлоо. Энэ үеэр Нийслэлийн Ерөнхий прокурор Д.Баярмагнайгаас зарим асуудлыг тодруулсан юм.  Тэрээр "ЖДҮХС-ийн хэрэгтэй холбоотойгоор одоогийн байдлаар зургаан хүнд таслан сэргийлэх арга хэмжээ аваад байна. ЖДҮХС-аас олгогдсон зээл зориулалтын дагуу ашиглагдах ёстой. Бид ЖДҮХС-аас олгогдсон зээл зориулалтын бусаар ашиглагдаж байна уу, үгүй юу, график төлөвлөгөөний дагуу эргэн төлөлт нь хийгдэж байгаа эсэх, тухайн зээл нь гадуур яригдаад байгаатай адил буюу санхүүгийн байгууллагад шилжиж, мөнгө хүүлсэн явдал болоод байгаа юм уу, үгүй юм уу гэдгийг шалгаж байна. Хэдэн гишүүний бүрэн эрхийн асуудал яригдаж байгаа талаар мэдээлэл өгөх боломж байхгүй. Хэргийг дөнгөж шалгаж эхэлж байгаа учраас хувь хүн, хуулийн этгээдийн нэр төр, алдар хүндийг гутаах мэдээлэл өгч болохгүй. ЖДҮХС-аас 222 ААН-д зээл олгох шийдвэр гаргаснаас 211-д нь зээл олгогдсон байна. Тиймээс бүх зээлийг шалгаж байгаа. Одоогоор ямар нэг компани байгууллагыг хаагаад битүүмжлээд шалгаад байгаа юм байхгүй. Зээл зориулалтын дагуу зарцуулагдаж, сангийн шалгуурыг хангаж зээлээ авсан байвал гэмт хэргийн шинжтэй гэж үзэхгүй. Прокурорын орлогчийн асуудал шалгагдаж байгаа. Ер нь бол орлогч прокурор өөрөө зээл авчихсан юм байхгүй. Эхнэрийнх нь байгуулсан компани зээл авсан байна лээ. Түүнийг нь бид шалгаж байна. Хэн ч байсан хуулийн хүрээнд шалгах л үүрэгтэй” гэлээ.  Эх сурвалж:www.polit.mn