С.САРУУЛ МАН-ын Удирдах зөвлөл хуралдаж Засгийн газрыг огцруулах шаардлагагүй гэж үзжээ. Хурлаас өмнө УИХ-ын гишүүн Л.Энх-Амгалан, С.Бямбацогт нарын 10 гишүүн хуралдаа суухгүй гэсэн мэдээллийг өгөөд байсан юм. Тэгвэл УИХ-ын гишүүн Т.Аюурсайхан, Л.Оюун-Эрдэнэ, Ч.Улаан, М.Оюунчимэг, Ц.Гарамжав нарын гишүүд МАН-ын 37 гишүүн Засгийн газрыг тогтвортой байх ёстой гэж үзэн 35 гишүүн гарын үсэг зурсан талаар мэдээлэв. Энэ талаар УИХ-ын гишүүн Т.Аюурсайхан “Ерөнхий сайд, МАН-ын дарга У.Хүрэлсүх амлалтаа биелүүлэх, төр нийгэмд шударга ёсыг тогтоох, эдийн засгийн өсөлтийг эрчимжүүлэх үйл явцад хамтарч ажиллах боломжгүй байна, саад тотгор учир байна гэсэн үндэслэлээр УИХ-ын дарга М.Энхболд, МАН-ын бүлгийн дарга Д.Хаянхярваа нарыг албан тушаалаасаа чөлөөлөгдөх шаардлага тавьсан. Энэ асуудал үүсэх үед УИХ-ын 27 гишүүн Засгийн газрыг огцруулах бичигт гарын үсэг зурсан. Нийгэм, эдийн засагт тогтворгүй байдал үүсч болзошгүй гэж үзэж байгаа учраас Засгийн газрыг үргэлжлүүлэх ажиллах ёстой гэж үзэж байна. Тиймээс МАН-ын бүлгийн 64 гишүүний 37 нь У.Хүрэлсүхийг цаашдаа үргэлжлүүлж ажиллаж, амлалтаа хэрэгжүүлэх боломжоор нь хангах ёстой гэж үзэн мэдэгдэж гаргаж, гарын үсэг зурлаа. Энэхүү мэдэгдэлд өнөөдрийн байдлаар 35 гишүүн гарын үсэг зураад байна” гэлээ. Төрийн байгуулалтын байнгын хорооны дарга Д.Лүндээжанцан, ХХААХҮ-ийн сайд асан Б.Батзориг нараас бусад нь гарын үсэг зуржээ. Эх сурвалж: www.polit.mn