Ч.ЗОТОЛ УИХ-ын гишүүн Ж.Мөнхбатын үг, үйлдэл сүүлийн үед олон нийтийн анхаарлын төвд байна. Хамгийн анх чуулганы нэгдсэн хуралдаанд валютын ханшийн талаарх Д.Эрдэнэбат гишүүний асуулгад ЗГХЭГ-ын дарга Г.Занданшатар хариулах үеэр засгийг огцруулж, УИХ-ыг тараах саналыг тэрээр гаргасан. Ж.Мөнхбат хэлэхдээ “Валютын ханшийн өсөлтийг Засгийн газар тавиад туучихсан. УИХ, Засгийн газрын зарчим яриад удлаа. Чухал асуудал хэлэлцэж байхад Сангийн сайд чинь яагаад байхгүй байгаа юм бэ. Г.Занданшатар та сайд нараа дуудаач. Засгийн газрын гишүүд бүрэн бүрэлдэхүүнээрээ сууж байх ёстой шүү дээ. Сая ЖДҮХС-гийн асуудал гарч, сайд нар нь холбогдлоо. Нэг хэсэг уралдаж уучлал гуйдаг үйл явдал өрнөлөө. Дараа нь уралдаж зээлээ төлж гүйлдлээ. Тэрийгээ сайн үйлс хийж байгаа мэтээр сурталчиллаа. Ерөнхий сайд ЖДҮ-чиддээ ямар ч хариуцлага тооцсонгүй. Эцэст нь үнэн үг хэлж, шүүмжилсний төлөө биднийг хэвлэлээр захиалга өгч, мөнгө төлөөд намнаж байна. Жишээ нь намайг гэхэд байр саванд орсон гээд гүтгэж, доромжилж бичүүлж байгаа. Цаашдаа үнэн үг хэлсэн, шүүмжилсэн хүмүүсийг барина, хорино, гяндална гэж байна. Хэлмэгдүүлэлт явуулж, шинэ Лхүмбийн хэрэг гээчийг гаргаж ирэх гэж байгаа юм уу. Ингэж байхаар Засгийн газар нь огцрооч, УИХ нь ч тарах ёстой. Хуулийн дагуу гишүүд өөрсдөө санаачлага гаргаад УИХ тарая. Би өөрийн баланкан дээр УИХ-ыг тараах гарын үсэг цуглуулна. Намайг дэмжиж байгаа гишүүд гарын үсэг зурахыг уриалж байна” гэсэн юм. Үүний өмнө Ерөнхийлөгч Х.Баттулга УИХ-ыг тараах саналыг УИХ-ын дарга М.Энхболдод хүргүүлээд байв. Үүний дараа Ж.Мөнхбат гишүүн УИХ-ыг тараах асуудлаар хэвлэлийн хурал зарлан мэдэгдэл хийсэн. Түүний санаа бол Засгийн газрыг огцруулахын төлөө гэж ойлгогдож байгаа. Өөрөөр хэлбэл, гишүүд УИХ-аа тараахдаа хүрэлгүй У.Хүрэлсүхийн Засгийн газрыг огцруулж таарна гэж тэрээр тооцоолсон байх. Засгийн газрыг огцруулахаар Д.Хаянхярваа гишүүн гарын үсэг цуглуулан 27 хүн зурснаар өргөн бариад байгаа бол Ж.Мөнхбатын эхлүүлсэн УИХ-ыг тараах санал эсрэгээрээ У.Хүрэлсүхийн талынханд “бойкот” хийх боломж олгочихлоо. Өчигдөр УИХ-ын чуулганы хуралд 40 орчим гишүүн оролцоогүй. Үүнийгээ “УИХ-ын дарга М.Энхболдын эсрэг бойкот зарласан” хэмээн мэдэгдсэн. Эрх баригч намынхан буюу Ерөнхий сайдын талыг барьж буй гишүүд дээр сөрөг хүчнээс УИХ-ын гишүүн Л.Болд, Ж.Батзандан нар нэгдэн Засгийн газрыг хамгаалахаа ил шулуун зарлаад байна. Эцэст нь УИХ-ын 75 гишүүнээс хэд нь УИХ-ын дарга М.Энхболдыг, хэд нь Ерөнхий сайд У.Хүрэлсүхийг дэмжих вэ гэдэг “улс төрийн тоглоом”-ын өрөг саарал ордонд дэлгэгдлээ. Ж.Мөнхбат юу эхлүүлчихв ээ? Эх сурвалж: www.polit.mn