Т.САЙХАН УИХ-ын чуулганы өнөөдрийн үдээс  өмнөх хуралдаанаар/11.22/ Ерөнхийлөгчийн 2019 оны төсөвт тавьсан хоригийг хэлэлцэх гэсэн боловч Ерөнхийлөгчийн Тамгын газрын дарга З.Энхболд танхимд орж ирээгүй юм. Улс төрийн үйл явдалтай холбоотойгоор УИХ-ын дэд дарга Л.Энх-Амгалан байр сууриа илэрхийллээ.   Түүний байр суурийг хүргэж байна. УИХ-ын дэд дарга Л.Энх-Амгалан “Өнөөдөр Монголд хуулийн засаглал байна уу  үгүй юу гэдэг нь эргэлзээ төрүүлж байна. Өнөөдрийн энэ жишээгээр эрх мэдэлтнүүдийн засаглалтай орон болчихоод байна. Би Ерөнхийлөгчийг Засгийн газраас өргөн барьсан төсөвт хориг тавьсан гэж ойлгосон. Гэтэл энэ нь цаанаа УИХ-д,Үндсэн хуульд хориг тавьсан хэрэг юм байна.  Ийм байж болох уу. Бид бүгд төрдөө тангараг өргөсөн. Улс орныхоо эрх ашгийг эрхэмлэн дээдлэнэ гэсэн.  Монголын Улсын төсвөөс илүү эрхэмлэн дээдлэх ийм эрх ашиг өнөөдөр бидэнд байгаа юу.  Эдийн засаг чинь хоригтой болчихлоо шүү дээ.  Ерөнхийлөгчөө.  Нүүрс чинь гарахаа больчихлоо.  Одоо 2019 онд Монгол Улс төсөвгүй болж байна. Монгол Улсын Ерөнхий сайд хүн УИХ-ын бүрэн эрхэд халдаж байна.  Энэ нь өөрөө хууль зөрчиж байгаа хэрэг.  Энэ нь огцруулах үндэслэл мөн.  Зүгээр нэг намын дарга хүн ингэж төрийн дээр гарч сууж болдог юм уу.  Эрх баригч намын дарга болохоос биш ингэж төрийн бойкотлож болдог юм уу. Ерөнхийлөгч ямар үндэслэлээр Зэвсэгт хүчний жанжин штабын даргыг чөлөөлсөн бэ. ОХУ-ын Батлан хамгаалахын сайд С.Шойгу Монгол Улсад ирээд танк, зэвсэг өгсөн байна. Энэ танк зэвсгээр яах гэж байгаа юм. Монгол Улсын Ерөнхий сайд нь намынхаа байранд 300 гаруй офицер цуглуулаад зэвсэгт тэмцэл бослогод уриалаад сууж байна. Энэ нь Үндсэн хууль зөрчсөн үйлдэл мөн үү. Ерөнхий сайд гурван сая хүний эрх ашгийг төлөө байна уу, өөрийнхөө сандал суудлын төлөө байна уу. Монгол Улсад зөндөө сонгууль болдог. Ингэж бослого тэмцэлд уриалан дуудаж байсан намын даргыг би хараагүй юм байна. Засгийн газар огцорч л байсан. Ингэж ард түмнээ бослого тэмцэлд уриалан дуудаж байсан намын дарга, Ерөнхий сайдыг би хараагүй юм байна. Өнөөдөр хуурамч шударга ёс ярьдаг багтай Ерөнхий сайд Монгол Улсад хэрэгтэй юу. У.Хүрэлсүх өнөөдөр намын дарга, Ерөнхий сайд хийх ёс суртахууны эрхгүй хүн гэдгээ харууллаа. УИХ-аас томилогдсон Ерөнхий сайд шүү. УИХ-ын өмнө хууль тогтоолыг хэрэгжүүлэх үүрэг хүлээсэн Ерөнхий сайд шүү. Гэтэл өнөөдөр УИХ-д халдаж байна. Ийм аймшигтай юм болж байгааг ард түмэн ойлгох хэрэгтэй. Энэ улс оронд юу болох гээд байна. Ерөнхийлөгч юу хийгээд байна вэ.  Үндсэндээ бид Үндсэн хуулийн зөрчил рүү явж байна” гэлээ. Эх сурвалж:www.polit.mn