-З.Баянсэлэнгэ: О.Баасанхүү манай намыг төлөөлөхгүй –

Ч.ЗОТОЛ Улс төрд үүссэн нөхцөл байдлын талаар МАХН-ын Гүйцэтгэх товчоо, Бага чуулганы гишүүд байр сууриа илэрхийллээ. Тус нам 2016 оны сонгуулиар  байгуулагдсан УИХ-ыг  “60 тэрбумын хэрэг” –ийн үр дүнгээр байгуулагдсан хууль бус гэж үзэж тарах нь зүйтэй гэж байв. Өнөөдөр ч энэ байр суурьтаа байгааг намын гишүүд нь ярьж байна. Засгийн газрын тухайд шат шатанд  хариуцлага тооцох ажлыг эхлүүлэх ёстой, үүнийг ажиглаж байна гэв.   Ц.Шаравдорж /Монгол Улсын гавьяат хуульч/: -МАХН-ын нэрийг барьж зарим хүн улс төрийн мэдэгдэл хийлээ. Энэ талаар тодруулна уу? -Г.Бямбасүрэн гэж хүн хэвлэлийн хурал хийж, ард нь О.Баасанхүү нар байгааг телевизээр харлаа. Тэр хүмүүс МАХН-ыг төлөөлөхгүй. Өнөөдөр бид хууль зүйн талаас бүх асуудлыг ярих ёстой. Дээд шүүхэд Н.Энхбаяр даргатай МАХН дүрэм, мөрийн хөтөлбөрийн шинэчилсэн найруулгыг бүртгүүлж, албан ёсны шийдвэрээ авсан. Тэгэхээр энэ хууль ёсных юм. МАХН-ын дарга хэн бэ гэдэг тодорхой. Н.Энхбаяр гэдэг хүн МАХН-ын дарга гэдгийг анх бүртгүүлсэн цаг хугацаа  нь ч, одоо дүрэм, хөтөлбөрөө шинэчлээд бүртгүүлсэн баримтад ч тодорхой байгаа. Иймд хууль зүйн дагуу Н.Энхбаяр МАХН-ын дарга гэдгийг хэн ч үгүйсгэж чадахгүй. Ер нь бол 3-4 зүйлээр  зүйлээр МАХН-ын дарга Н.Энхбаяр гэдэг нь батлагдаж байгаа. Анх МАХН-ыг Дээд шүүхэд бүртгүүлсэн бүртгэлд бий. Дараа нь Дээд шүүхийн сайтад мэдээлсэн байгаа. УИХ-ын нөхөн сонгуулийн 42 дугаар тойрогт өрсөлдөхөөр намууд бичиг баримтаа СЕХ-нд өгсөн, түүн дээр бий. Аудитын газрын асуулгад хариулсан СЕХ-ны тайлбарт бий. Тэгэхээр өнөөдөр ч тэр хүн намын дарга хэвээрээ, МАХН даргатай гэдгийг давхар батлаад байхад О.Баасанхүү, Г.Бямбасүрэн нар нийгмийг төөрөгдүүлж буй нь болчимгүй  хэрэг юм.   Ц.Оюунбаатар /МАХН-ын дэд дарга/: -МАХН улс төрийн нөхцөл байдлыг юу гэж үзэж байна? -Монгол Улсын нийгэм, эдийн засагт ноцтой байдал үүслээ. Монгол Улсын тусгаар тогтнол, үндэсний аюулгүй байдал, иргэдийн эрх чөлөө, эдийн засгийн байдал ихээхэн бүдгэрлээ.Эрх баригч нам дотроо 3-4 хуваагдан  зөрчилдөж байна. Татвар төлөгчдийн мөнгийг бүлэглэлүүд  их, бага хэмжээгээ хуваан авч завшсан, түүний дотор ЖДҮХС-г цөлмөсөн. 122 төрийн өндөр албан тушаалтан, тэр дотор УИХ, Засгийн газрын гишүүд тэрбум төгрөгийг  авчээ. Дээр нь Үнэ тогтворжуулах, Мал  хамгаалах, Гурилын үнэ тогтворжуулах сан нэрээр төсвийн мөнгийг хувааж завшсан нь ил болж ард түмнийг бухимдуулж, нийгмийн том тэсрэлт үүсэхэд хүргэлээ. Монгол хүн бүр бухимдаж, эх орон, газар шорооны төлөө тэмцэгчид асуудал хөндөж байна. Шатахууны үнийн нэмэгдлээс блдж бараа, бүтээгдэхүүний үнэ нэмэгдсэн атал цалин тэтгэвэр нэмэгдээгүй. Хүмүүсийн авч буй цалин амьжиргаанд нь хүрэхгүй болж ард түмэн ядуурлын туйлд хүрлээ. Энэ хариуцлагыг хүлээх хүн алга. МАХН улс төрийн том хүчний хувьд асуудалд буурьтай хандаж байна. 2016 оны сонгуулиар төрийн албыг худалдаж авч төрийн эрхэнд гарч ирсэн МАН-ын удирдлагууд эрх мэдэл, албан тушаалтайгаа зууралдаж байна. Сонгуульд төрийн албыг худалдаж, иргэдийн дэлгүүрт тавьсан өрийг өмнөөс нь төлж саналыг нь худалдаж авсны гор гарч байна. Тиймээс эхний ээлжинд УИХ тарах ёстой шаардлагыг МАХН, улс төрийн намуудаас анх удаа  гаргаж, УИХ-д өргөн барихдаа ЖДҮ-ийн авлига, хээл хахууль, түүний үр дагаврыг тодорхой дурдсан шаардлагыг өгсөн. Цаашид шат дараатай арга хэмжээ авна.   З.Баянсэлэнгэ /УИХ-ын гишүүн, БХБ-ын сайд асан/: О.Баасанхүү  намыг төлөөлөх эрхгүй -Г.Бямбасүрэн, О.Баасанхүү нарын хүмүүс  МАХН-ын байр суурийг илэрхийлж  мэдээлэл хийсэн нь ямар учиртай вэ? -2016 оны УИХ-ын сонгуулийн дүнд манай намаас нэг төлөөлөл сонгогдон ажилласан нь О.Баасанхүү.Гэтэл тэр үеэс эхлэн намын төлөөлөл бус хэн нэг хүн, аль нэг бүлэглэлийн захиас даалгавраар ажиллаж, намын эсрэг үйл ажиллагаа явуулж, намыг дотроос нь хагалан бутаргах оролдлого хийж ирсэн учраас тэр хүний хийж байгаа үйлдэл МАХН-ын төлөөллийн байр суурь биш юм. Тэр хүн манай намыг төлөөлөх, УИХ-д намын  байр суурь илэрхийлэх эрхгүй. Сошиалд тавьсан мэдээллийнх нь дор төөрөгдөлд орсон жирийн гишүүдийн байр суурь харагдсан. Тэнд “Таны яриад байгаа үнэн үү, бид намын даргатайгаа уулзмаар байна” гэсэн байна лээ. Гэтэл О.Баасанхүү цэцэрлэгийн хүүхэд хуурч байгаа аятай” Та нарыг очвол зодно шүү” гэсэн байна лээ. Тиймээс түүнийг дагаж төөрөгдөлд орсон хүмүүс нам дээрээ ирж  намын даргатай уулзах үүд хаалга нээлттэйг хэлье. Эх сурвалж: www.polit.mn