П.Мандах Цахим мэдээллийн www.newspress.mn сайтад “...Монгол Улсын Хөдөлмөрийн баатар Л.Чинбат “Тариалан эрхлэгчдийг дэмжих сан”-гийн үрийн буудайн төлбөрт төсөвлөсөн мөнгөний тавь орчим хувийг ганцаараа хүртжээ. Хүнсний үрийн буудайны төлбөрт зориулж 2017 оны улсын төсөвт 16 тэрбум төгрөг тусгасан бөгөөд 12 аймгийн 65 сумын 729 иргэн, аж ахуйн нэгж урамшуулал авах шалгуурт тэнцсэн гэж тухайн үед мэдээлж байсан билээ. Засгийн газрын 2017 оны хоёрдугаар сарын 22-ны өдөр болсон хуралдаанаар үрийн буудайн үйлдвэрлэлийг дэмжих шийдвэр гаргасан байдаг. Л.Чинбатын нэр дээр бүртгэлтэй “Гацуурт” ХХК 3 375 000 000, “Баяндулаан уул” ХХК 1 387 500 000, “Шаргал тариа” ХХК 675 000 000, “Скрин” ХХК 600 000 000, “Сэлэнгэ Тос” ХХК 562 500 000, “Монгол ногоо” ХХК 525 000 000, “Вигобуудай” ХХК 375 000 000, “Хэрлэн Алтай” ХХК 144 830 000 төгрөг тус тус 2017 оны арванхоёрдугаар сарын 20-нд “Тариалан эрхлэгчдийг дэмжих сан”-аас авчээ. Найман компанид төсвөөс шилжүүлсэн мөнгөний дүн нийтдээ 7 644 830 000 төгрөг болж байна. Өнгөрсөн жил үрийн буудайны төлбөрт 16 тэрбум төгрөг төсөвлөсөн байдаг. Энэхүү төлбөрийн 48 хувийг Л.Чинбат ганцаараа хүртсэн болж таарч байна. Арваннэгдүгээр сарын 01-ээс хэрэгжиж эхэлсэн Хуулийн этгээдийн улсын бүртгэлийн хуулийн ачаар энэ бүх мэдээллийг уншигч танд хүргэх боломжтой болсныг дашрамд нь дуулгая” гэж мэдээллээ. Харин Хөдөлмөрийн баатар Л.Чинбат “...Миний хувьцаа эзэмшдэг “Гацуурт” ХХК болон бусад компаниуд 2017 онд ХААЯ-ны харьяа Тариалан эрхлэлтийг дэмжих сангаас нэг ч төгрөгийн урамшуулал аваагүй болохыг хариуцлагатайгаар мэдэгдэж байна. Л.Чинбат миний нэр төрийг унагах зорилгоор мэдээллийг тарааж байгаа www.newspress.mn сайт болон уг худал мэдээллийг захиалгаар нийтэлсэн этгээдүүдийг хууль хяналтын байгууллагаар шалгуулж, үнэн мөнийг тогтоолгох болохыг мэдэгдэж байна” гэжээ. Одоогоор www.newspress.mn сайт хариу тайлбар хийгээгүй байна. Тиймээс хэвлэлдээ итгэх үү, Хөдөлмөрийн баатарт итгэх үү гэсэн асуулт тавигдлаа. Эх сурвалж: www.polit.mn