Т.САЙХАН УИХ-ын гишүүн Ж.Батзандангийн байр суурийг хүргэж байна.   -Танай намын бүлэг  УИХ-ын чуулганыг орхин гарсан.  Энэ нь цаг үеэ олсон шийдвэр байв уу? -Олон нийт бухимдалтай байна. УИХ-ын цөөнгүй гишүүн авлига, албан тушаалын асуудалд нэр холбогдчихоод байхад хууль хяналтын байгууллагууд ажлаа хийх ёстой. Мөн УИХ-ын дотоод хяналтын байгууллага болох Ёс зүйн хороо хуралдаж дүгнэлтээ гаргахгүй байна. Хоёрдугаарт, УИХ Ерөнхийлөгчийн тавьсан шаардлагыг хэлэлцэх ёстой. УИХ улсын төсвийг их хэмжээний алдагдалтай баталсанд Ерөнхийлөгч шүүмжлэлтэй хандаж байгаа. Иймд тэд өөрөө санаачилж, төсвийн хуулиар нээлттэй сонсгол хийх ёстой гэдэг шаардлагыг УИХ-ын даргад хүргүүлж байна. -Ерөнхийлөгчийн саналыг дэмжиж байгаа юу? -Тийм ээ.  Хэрэв Ерөнхийлөгч УИХ-ыг бүрэн эрхээ хэрэгжүүлэх чадамжгүй болсон гэж үзвэл УИХ-ын даргад зөвшилцөх санал болгож, УИХ өөрөө тарах шийдвэр гаргаж болно гэсэн хуулийн заалт бий. Ийнхүү тарах шийдвэр гаргасан тохиолдолд шинээр сонгогдсон гишүүдийг тангараг өргөтөл УИХ бүрэн эрхээ хэрэгжүүлнэ. Мөн УИХ-ын гишүүний гуравны хоёр нь тарах ёстой гэж үзсэн тохиолдолд, УИХ нь Ерөнхий сайдаа 45 хоногийн дотор томилж чадаагүй бол их хурал тарах заалттай. Бид өнөөдөр бие биенийхээ санаа бодлыг сонссон ч сонсоогүй мэт зүгээр өнгөрөөдөг байж болохгүй. Төрийн институтууд бие биенийхээ тавьж буй шаардлагад хүндэтгэлтэй хандаж, асуудлыг шийдвэрлэхийн төлөө бодитой ханддаг байх ёстой. -С.Зоригийн хэргийн асуудлаар нээлттэй сонсгол хийнэ гэж та ярьж байсан.  Энэ талаараа тодруулахгүй юу? -С.Зориг агсны амь насыг хөнөөсөн гэмт хэрэгтнүүдийг шалгаж, захиалагчийг олон түмэнд зарлана гэж гарч ирсэн эрх баригч намын албан тушаалтнууд өнөөдөр С.Зоригийн хэргийн хөөн хэлэлцэх хугацаа дууссан учир хэргийг хааж байна гэж тархи угааж байна. Үүнийг миний бие УИХ-ын гишүүний хувьд ч, АН-ын бүлгийн дэд даргын хувьд ч хүлээн зөвшөөрөхгүй. Ер нь соёлын өвийг хулгайлсан, устгасан гэмт хэргүүд болон авлига, төрийн өндөр албан тушаалтнуудтай холбоотой олон гэмт хэрэг хөөн хэлэлцэх хугацаа дууссан гэдэг нэрийдлээр дуусгавар болж байна. Тэгвэл хөөн хэлэлцэх хугацааг хуулиар сунгах боломжтой шүү дээ. Эх сурвалж: “Зууны мэдээ” сонин