Б.ҮЕНЧ Чуулганы өнөөдрийн хуралдаанаар гишүүдийн 90.8 хувийн саналаар Зам, тээврийн хөгжлийн яамны сайдаар Я.Содбаатарыг томиллоо. Тэрээр томилогдсон даруйд Шадар сайд Ө.Энхтүвшингээс тамга, тэмдгээ хүлээж авсан юм. Зам, тээврийн хөгжлийн сайд Я.Содбаатарын ажлаа авсныхаа дараах анхны жиргээг “Сошиалын булан”-д онцолж байна. Тэрээр “​Улс орны маань хөгжлийн амин судас болсон энэхүү чухал салбарт миний бие эрдэм боловсрол, хүч бололцоогоо дайчлан ажиллахын зэрэгцээ салбарынхаа чадварлаг мэргэжлийн хамт олныхоо хүч дэмжлэгтэйгээр тулгамдаж байгаа олон асуудлыг шийдвэрлэж чадна гэдэгтээ итгэл төгс байна. ​Юуны өмнө өнө эртний түүхэн уламжлал, өндөр босго бүхий Монгол төрийн нэр хүндийг сэвтээж байгаа төрийн зарим албан хаагчдын хариуцлагагүй, ёс суртахуунгүй, төрийн албанд хоноцын сэтгэлгээ, ашиг хонжоо харсан байдлаар ханддаг байдалтай эвлэрэхгүй гэдгээ хэлэхийг хүсч байна. ​Нэг үеэ бодвол эдийн засаг сайжирч байна, хийх, бүтээх эрмэлзэл дүүрэн, чадварлаг залуучууд олон байна. Гадаад дотоодын хөрөнгө оруулагчдын итгэл ч сэргэж байна. ​Одоо гагцхүү хамт олны идэвх чармайлтыг улс орон, салбарын өмнө тулгамдсан томоохон зорилтыг шийдвэрлэхэд зөв чиглүүлэх, оновчтой зохион байгуулалт бүхий чадварлаг удирдлага, төрийн албан хаагч бүрийн хариуцлага, гүйцэтгэх чадварыг дээшлүүлэн удирдах албан тушаалтнууд манлайлан ажиллах шаардлага хэрэгцээ урьд урьдаас илүү тулгарч байна.​ ​Энэ томилгоог надад хүлээлгэж байгаа өндөр хариуцлага, итгэл найдвар, хийж бүтээхийн төлөө цаг нартай уралдан ажиллах бүтээлч даалгавар гэж хүлээн авч байгаагаа дахин илэрхийлье” гэжээ. Эх сурвалж: www.polit.mn