Б.ДАМДИН-ОЧИР МАН-ын Удирдах зөвлөл хуралдаж, УИХ-ын гишүүн Я.Содбаатарыг ЗТХ-ийн сайдад дэмжсэн байна. Хуучнаар бол Удирдах зөвлөл ингээд шийдчихсэн байхад Я.Содбаатар сайд болчихлоо гэж үзэхэд бараг болно. Гэхдээ нөхцөл байдал өөрчлөгдсөн. МАН-ын Удирдах зөвлөл ингэж чиглэл өгсөн ч гишүүд нь өөр шийдвэр гаргадаг болоод байгаа. Өнгөрсөн есдүгээр сарын 20, 21-нд болсон Нийслэлийн МАН-ын Бага хурлаас МАН-ын Удирдах зөвлөлийн эсрэг шийдвэр гарсан. Тэр асуудал тэгээд л өнгөрсөн. Харин үр дүнд нь МАН-ын Удирдах зөвлөл гэдэг “шүдгүй арслан” болсон гэдгийг энэ намын зарим удирдлагууд дээрх ажиллагаанд оролцосоноор тунхаглан зарласан юм. Тийм болохоор Нийслэлийн МАН-ын 360 гаруй хүн өөрсдийнхөөрөө шийдэж чадаж байгаа юм чинь УИХ-ын 64 гишүүн нь тухайн чуулганы “цаг агаар”-ыг харж байгаад л хэнийг сайд болгохыг шийдчихнэ гэсэн үг. Ер нь бол Я.Содбаатар УИХ дээр унах магадлал өндөр. МАН-ын Удирдах зөвлөл 100 хувийн саналаар түүнийг ЗТХ-ийн сайдад дэмжээгүй нь тодорхой юм. Түүнийг эсэргүүцэх нам биш юм гэхэд бүлэг фракцууд бол бий. Нөгөөтэйгүүр У.Хүрэлсүхийн Засгийн газрыг анх байгуулахад ЗТХЯ-ыг 32-ын бүлэг нь авч, Ж.Бат-Эрдэнийг томилсон байдаг. Энэ тохироогоо бодвол Я.Содбаатар биш 32-ын бүлгээс нэр дэвшсэн Ё.Баатарбилэг сайд болох ёстой юм. Гэвч сүүлийн үед МАН-ын нөлөө бүхий улстөрчид тохирооноосоо ухардаг болсон. Намынх нь төв байгууллагын шийдвэр ч хаданд хашгирсан шиг замхардаг болчихсон юм. Ингэхээр УИХ хэнийг ч сайдаар томилж мэднэ. Нөгөө талаар Я.Содбаатар ЗТХ-ийн сайд болох юм бол Засгийн газар унаж магадгүй.  32-ын бүлэг буюу УИХ-ын дарга М.Энхболд нар Засгийн газрыг анхны тохирооноосоо буцлаа гэж үзвэл “тоосго сугалах” зарчмаар Засгийн газрыг ганхуулж эхэлнэ гэсэн үг. Тэгэхээр Я.Содбаатарын хүсээд байгаа сайдын суудал У.Хүрэлсүхийн Засгийн газрын үнэтэй болж таарч байгаа юм. Эх сурвалж: www.polit.mn