С.САРУУЛ Чуулганы баасан гаригийн /2018.10.26/ нэгдсэн хуралдаанаар Нийгмийн хамгааллын тухай Монгол Улс, Бүгд Найрамдах Польш Улс хооронд байгуулсан хэлэлцээрийг соёрхон батлах тухай хуулийн төслийг хэлэлцэж дэмжив. Энэ үеэр Хөдөлмөр, нийгмийн хамгааллын сайд С.Чинзориг “Польш Улсад манай улсын 940 иргэн ажиллаж амьдардаг гэсэн судалгаа гарсан. Тэдгээр иргэд эрүүл мэндийн даатгал төлдөг. Харин нийгмийн даатгалын шимтгэлээ Польш улсад төлж байгаа ч тус улсын хуулийн дагуу нийгмийн даатгалын сангаас тэтгэвэр, тэтгэмж авах эрх нь үүсдэггүй.  Монголдоо нийгмийн даатгал, шимтгэлээ төлөөгүй учраас Монгол Улсаасаа нийгмийн даатгал хүртэх эрх нь мөн  хязгаарлагдмал байгаа. Тиймээс хоёр улсын хооронд байгуулсан  хэлэлцээрийн дагуу тус улсад ажилласан жил төлсөн нийгмийн даатгалын шимтгэл, Монгол Улсад ажилласан жилийн нийгмийн даатгалын шимтгэлээ нэгтгэж болно. Ингэснээр Польш улсад ажилласан жил нийгмийн даатгалын шимтгэл төлсөн жилд оногдох тэтгэврээ Польш Улсын талаас харин Монгол Улсад ажиллаж нийгмийн даатгал, шимтгэлээ төлсөн жилдээ оногдох тэтгэврээ монголоос авах эрх нь үүсэх юм.Тэтгэмжүүдээ ч авна” гэсэн мэдээллийг өглөө. Эх сурвалж: www.polit.mn