С.САРУУЛ Баасан гаригийн /2018.10.19/ чуулганы нэгдсэн хуралдаанаар Валют зохицуулалтын тухай хуулийн шинэчилсэн найруулгыг хэлэлцэв. Хуульд стратегийн ач холбогдол бүхий орд газарт үйл ажиллагаа явуулдаг гадны хөрөнгө оруулалттай компаниудын дансыг Монголбанканд байршуулах талаар тусгажээ. Энэ үеэр зарим гишүүн Оюутолгойн хөрөнгө оруулалтын мөнгө Монголын банкаар дамжих ёстой гэсэн байр суурийг илэрхийлсэн юм. Харин Эрчим хүчний сайд Ц.Даваасүрэн “Оюутолгой мөнгөө гадуур дамжуулаад байгааг дэмжихгүй. Өмнө нь Оюутолгойн мөнгийг Монголын банкны дансаар дамжуулдаг больё гэдэг шийдвэрийг УИХ гаргасан. Төв банкны биш Монголын банкаар дамжуулах. Манайхан хямд хүүтэй зээлийн үүсвэрийн тухай их ярьдаг. Үүнийг захиргаадлаар шийдэж чадахгүй. Гадны хямд хүүтэй, хямд эх үүсвэртэй банкуудийг оруулж байж шийднэ. Тэр банкуудыг бид захиргаадаад оруулж ирж чадахгүй. Тэд ашиг хөөж орж ирнэ. Оюутолгой, Тамсагийн ордын том мөнгүүд Монголын татварын дансаар дамждаг болсон тохиолдолд гадны банкууд өөрөө ороод ирнэ. Оюутолгойн төсөл яригдаж байх үед нэлээн том банкны групп Монголд оруулж ирэх судалгаа хийж байсан. Хамгийн гол нь Төв банкаар дамжуулна гэвэл гадны банк орж ирэхгүй. Гадны хямд эх үүсвэрийг оруулж ирэх бол Монгол Улсад байршилтай арилжааны банкаар татварын данс нээгээд мөнгөө дамжуулна гэвэл гадны банк том компаниудаа дагаад ороод ирнэ”гэлээ.  Эх сурвалж: www.polit.mn