С.САРУУЛ Улаанбаатарын утааг бууруулахын тулд энэ өвөл 54 тэрбум төгрөгөөр айлуудын янданд шүүлтүүр суурилуулах асуудалд Байгаль орчин, аялал жуулчлалын сайд Н.Цэрэнбат тайлбар хийлээ. Тэрээр “Улаанбаатарын иргэдийн 52.9 хувь нь амьсгалын замын өвчлөлтэй. Хотын эрүүл мэндийн байгууллагууд 18-аас доош насны хүүхдийн амьсгалын замын өвчлөлд 10 гаруй тэрбум төгрөг зарцуулж байгаа, агаарын бохирдолтой орчинд амьдарч байгаа хүүхдийн уушгины багтаамж хөдөөгийн хүүхдээс 40 хувиар бага байна гэсэн судалгааны үр дүн байна. Тиймээс иргэдийн эрүүл мэндийг зайлшгүй ярих ёстой.Агаарын бохирдлын 80 хувь гэр хорооллын 220 мянган өрхийн галлагаанаас үүдэлтэй. 100 гаруй мянган айлын янданд бүрэн шаталт бий болгох төхөөрөмж суурилуулж, агаарын бохирдлыг дорвитой бууруулна гэж тооцоолж байгаа. Энэ бол бага зардлаар агаарын бохирдлыг бууруулах шийдэл. Энэ мөнгөөр 900 айлын орон сууц барьж, 4000 айлын байрны урьдчилгаа өгч болох ч энэ нь богино хугацаанд агаарын бохирдлыг бууруулахад дорвитой нөлөө үзүүлэхгүй. Тиймээс аль болох эрүүл мэнддээ хохирол багатай үр дүнтэй аргыг хэрэглэх гэж байна. Математик утгаар агаарын бохирдлыг бууруулах шийдлийг сонгосон гэдгийг хэлмээр байна. Мөн агаарын бохирдлыг бууруулах чиглэлээр нам даралтын зуухнуудыг хэрэглээг зогсоож, түүхий нүүрсний хэрэглээг 10 орчим хувиар бууруулах болсон. Үйлдвэрлэгчид 80-90 хувийн баталгаа гаргаж өгч байгаа” гэлээ. Эх сурвалж: www.polit.mn