С.САРУУЛ УИХ дахь сөрөг хүчнийхэн Засгийн газрыг бүрэлдэхүүнээр нь огцруулах, цаашлаад УИХ-ыг тараах шаардлага тавиад байгаа юм. АН-ын бүлэг хоёр хоногийн өмнө  хуралдаж дээрх шийдвэрийг гаргасан талаараа мэдээлж байв. Бүлгийн гишүүд дундаа Засгийн газрыг огцруулах, эрх баригч намынханд хариуцлага тооцох талаар хамгийн их ярьдаг хүн нь Ж.Батзандан гишүүн. Тэрээр энэ удаад ч гэсэн Засгийн газар хариуцлагагүй ажиллаж байгаа учраас огцруулна гэсэн байр сууриа хатуу илэрхийлсэн. Энэ талаар Ж.Батзандан гишүүн “Ардчилсан намын бүлэг болон  Ардчилсан намсын Улс төрийн зөвлөлөөс  үүсч буй зарим асуудлуудтай холбоотойгоор албан ёсны мэдэгдэл хийх шаардлага гарсан. Төрийн систем байгууллагын төвшинд хаа хаанаа хариуцлага алдаж буйг бид дүгнэж үзсэн.Монгол Улс ардчилсан орон болохынхоо хувьд  гаднаас хүн хулгай хийхгүй, мөн  хууль ёсоор амьдарч байгаа хүнийг хулгайд алдахгүй байх үүрэгтэй. МАН эрх барьж байхад гаднаас хулгай хийдэг, дотроосоо зөвшөөрдөг явдал газар авч байгаа. Энэ нь саяхан болсон БНТУ-ын иргэнийг өгч явуулахаар энэ Засгийн газар гадны байгууллагатай тохиролцсон явдлыг бид эрс эсэргүүцэж байна. Энэ хариуцлагагүй байдлынхаа тухай Засгийн газрын нэг ч сайд, дарга мэдэгдэл хийгээгүй. Олон улсын гэрээ конвенци, Монгол Улсын Үндсэн хуулийг уландаа гишгэсэн энэ байдал нь Засгийн газар,УИХ огцрох хангалттай шалтгаан мөн гэж харж байна. Хариуцлага ярихаар зугтаж, бултдаг ийм УИХ, Засгийн газар байж болохгүй. Ганцхан дарга, сайдад хариуцлага тооцож бултана гэсэн зүйл байхгүй.Засгийн газар бүрэн бүрэлдэхүүнээрээ хариуцлагаа хүлээхийг шаардаж байна. Үүний төлөө Ардчилсан намын бүлэг ард түмэнтэйгээ хамт зогсох болно” гэж байв. Гэтэл Ж.Батзандан гишүүн энэ мэдэгдлийнхээ дараахан твиттер хуудсандаа “Дараагийн ЗГ одоогийнхоос илvv болно гэдэгт би итгэхгvй бна. Огцруулаад бvх юм сайхан болно гэдэг ч худлаа. Еренхий Сайд ярьсан хувьсгалаа яаралтай эхлvvлэх хэрэгтэй.Тэгвэл дэмжинээ” хэмээн жиргэжээ. Эндээс харвал Засгийн газрыг огцруулах эрхэм гишүүний тэмцэл 24 цагийн дотор өөрчлөгдөж эцэс болов бололтой. Эх сурвалж: www.polit.mn