С.САРУУЛ МАН-ын удирдах зөвлөл хуралдаж улс төрийн зарим шийдвэр гаргажээ. Энэ талаар МАН-ын Ерөнхий нарийн бичгийн дарга Д.Амарбаясгалан мэдээлэл өгөхдөө “МАН-ын сахилга хариуцлагыг чангатгах тухай, хариуцлага тооцож ажиллах тухай тогтоол баталсан. Энэ тогтоолыг өнөөдөр бид Удирдах зөвлөлийн хурлаар хэлэлцэн ярилцлаа. Тогтоолд  улстөрийн болон ёсзүйн шаардлага хангаж ажиллахгүй байгаа хүмүүстэй хатуу хариуцлага тооцож ажиллах чиглэлийг тусгаж  МАН-ын дарга У.Хүрэлсүхэд үүрэг өгсөн. Удирдах зөвлөлийн хурлаар Зам тээврийн хөгжлийн дэд сайдыг томилох тухай хэлэлцлээ. Дэд сайдын боловсон хүчний бүртгэлтэй байсан болон өөрсдөө хүсэлт гаргасан долоон хүнээс Л.Халтарыг нэр дэвшүүлэхээр боллоо” гэв.  Л.Халтар нь Төмөр замын ашиглалтын инженер, бизнесийн менежер мэргэжилтэй. ОХУ-ын Санкт-Петербург хотын Төмөр замын сургууль, ОХУ-ын Эрхүү хотын Замын харилцааны их сургуульд тус тус суралцаж, төгссөн. Улаанбаатар төмөр замын орлогч дарга, удирдах албан тушаалд ажиллаж байсан. Одоо УБТЗ-ын орлогч даргаар ажиллаж байгаа аж. Харин хурлын үеэр Засгийн газрын хэрэг эрхлэх газрын дарга Г.Занданшатар "Төрийн албаны тухай ёс зүй, сахилга хариуцлагын тухай төслийг бид шинэчлэн найруулахаар ажиллаж байна. Уламжлалт төрийн реформыг хэрэгжүүлнэ. Энэ чиглэлийн ажлыг бид улам эрчимжүүлж, Монголын төрийг төр шиг байлгахын төлөө ажиллана" гэдгийг онцоллоо. Эх сурвалж: www.polit.mn