Т.БАТСАЙХАН Өнөөдөр наймдугаар сарын 1.  Ерөнхий сайд У.Хүрэлсүхийн хэлснээр бол төрийн албан хаагчид амралтаа дуусгаж,  ажилдаа орох учиртай.  Өнгөрсөн сарын 19-нд болсон Улсын онцгой комиссын хуралдаан дээр Ерөнхий сайд энэ талаар  мэдэгдсэн байдаг.  Тэрээр “Наймдугаар сарын 1 гэхэд төрийн алба бүрэн бүрэлдэхүүнээрээ ажиллаж эхлэх ёстойг анхааруулъя. Мөн найр наадмуудыг дуусгаарай” хэмээн үүрэг өгсөн.  Ерөнхий сайдын санаа нь зөв боловч энэ даалгавар хууль журмын хүрээнд нэг л биш сонсогдоод байгаа юм.   Төрийн албан хаагчид ч гэсэн хүн.  Тэд Хөдөлмөрийн тухай хуулийн  дагуу   жилдээ нэг удаа ээлжийн амралтаа эдлэх эрхтэй.  Ийм хуулийн зохицуулалт зөвхөн Монголд ч биш олон  улсад  бий. Тухайлбал, Хөдөлмөрийн тухай хуулийн 79 дүгээр зүйлд  ажилтан жилд нэг удаа ээлжийн амралтаа  өөрийн биеэр эдлэх эрхтэй хэмээн заажээ. Мөн Хөдөлмөрийн тухай хуульд ажлын зайлшгүй шаардлагаар ээлжийн амралтаа биеэр эдэлж чадахгүй тохиолдолд ажилтанд мөнгөн урамшуулал олгож болно. Мөнгөн урамшуулал олгох журмыг хамтын гэрээгээр, хамтын гэрээгүй бол ажилтантай тохиролцсоны үндсэн дээр ажил олгогчийн шийдвэрээр зохицуулна хэмээн заажээ.   Тэгэхээр Ерөнхий сайдын хэлсэнд гаргалгаа байгаа л даа.  Наймдугаар сарын 1-нд  бүх төрийн албан хаагчдаа ажилд нь оруулаад амралтаа эдэлж  чадаагүй хүмүүстээ мөнгөн урамшууллыг өгч болно.  Гэхдээ эдийн засгийн хүндхэн нөхцөл байдалд  байгаа энэ үед  угаасаа үлгэр. Тэгэхээр  улс төрийн нөхцөл байдлын үүднээс  Төрийн албан хаагчдын ээлжийн амралт руу “халдах” нь Ерөнхий  сайд У.Хүрэлсүхийн хувьд зохимжгүй л асуудал.  Улстөрч  хүн попорч болно.  Гэхдээ хуулийн хүрээнд арай л амьдралтай попрох хэрэгтэй л дээ.  Ер нь  тухайн өдөр болсон  Улсын  комиссын хуралдаан дээр яригдсан асуудлууд ард иргэдийн амьдралаас нэг л  хол сонсогдож байлаа.  Тухайлбал наймдугаар сарын 1 гэхэд найр наадмаа  дуусгах үүрэг өгсөн.  Энэ нь үлгэр болсон.  Энэ сарын 4, 5-нд Даншиг наадам Хүй  долоон худагтад болох товтой байна. Мөн Баян-Өлгийн замыг цэргүүдээр бариулах юм болсон.  Тендерээс хэдэн төгрөг унагадаг албан тушаалтнууд  хэзээ ч цэргүүдээр зам бариулахгүй нь тодорхой.  Тэгэхээр хүнд үүрэгдэж, загнаж, ширээ шааж болно.  Хамгийн гол нь үр дүнтэй  хуулийн хүрээнд баймаар байна. Таны  хэлснээр наймдугаар са­рын 1 гэхэд найр наадам дуусахгүй, тэр замыг цэргүүд барихгүй нь. Төрийн албан хаагчид ч өнөөдөр бүгд ажилдаа орж, бүрэн бүрэлдэ­хүүнээрээ ажиллана гэдэгт итгэхгүй байна.  Төрийн дээр хууль бий.   Хөдөлмөрийн хуулиа уншаарай, Ерөнхий сайд аа гэж хэлээд таны амыг таглачихна даа. Хөдөлмөрийн тухай хуулийн 79 дүгээр зүйлд  ажилтан жилд нэг удаа ээлжийн амралтаа  өөрийн биеэр эдлэх эрхтэй. Эх сурвалж: “Зууны мэдээ” сонин