
Б.ТӨГС
МАХН-ын дүрмийн шинэчлэлийг батлахгүй гэсэн Дээд шүүхийн шийдвэрт нийцүүлэн МАХН-ын Ээлжит бус Их чуулганыг долдугаар 7-нд хуралдуулахаар болсон. МАХН-ын дарга, Монгол Улсын гурав дахь Ерөнхийлөгч Н.Энхбаяр Монгол Улсын Дээд Шүүхийн 2018 оны гуравдугаар сарын 12-ны өдрийн 07 тоот Тогтоолд заасныг харгалзан үзэж, МАХН-ын Дүрмийн арванхоёрдугаар зүйлийн 12.2-т заасан бүрэн эрхийнхээ дагуу дээрх шийдвэрийг гаргасан бөгөөд Ээлжит бус Их чуулган зарлагдсантай холбогдуулан ХХ Бага чуулганыг энэ сарын 27-нд хуралдуулсан. Бага чуулганаас гарсан шийдвэрүүдийг өчигдөр МАХН-ын удирдлагууд олон нийтэд мэдээллээ. Ээлжит бус Их чуулганы товыг хэвээр баталсан бөгөөд нийт 1044 төлөөлөгч оролцохоор болжээ. Мөн дүрэм, мөрийн хөтөлбөрийн төслийг боловсруулах ажлын хэсэг, чуулганы хуралдааныг зохион байгуулах үндэсний хорооны гишүүдийг томилжээ.
Эх сурвалж: www.polit.mn