С.САРУУЛ УИХ дахь МАН-ын бүлэг Таван толгойг хөгжүүлэх цогц бодлогыг /2018.05.21/-ний хурлаараа хэлэлцжээ. Засгийн газраас Таван толгойн төслийг цогцоор нь хөгжүүлэх, үр ашгийг нэмэгдүүлэх боломжит хувилбар саналуудыг боловсруулж, УИХ дахь МАН-ын бүлгийн хуралдаан танилцуулсан байна. Энэ талаар МАН-ын бүлгийн дарга Д.Хаянхярваа “Бүлгийн хурал дээр Засгийн газраас Таван толгой төслийг хөдөлгөх, үр ашгийг нэмэгдүүлэх чиглэлийн тооцоо, судалгааг сонсч хэлэлцлээ. Тухайлбал, тээвэрлэлт, төмөр зам, үйлдвэржилт, борлуулалтын талаарх тооцоо, судалгаа бүхий мэдээллийг сонссон. Ирэх долоо хоногт МАН-ын бүлэг Таван толгойн төслийг хөдөлгөх чиглэлд улс төрийн шийдэл гаргах чиглэлд хамтарч ажиллах тохиролцоонд хүрсэн. Уг тооцооллыг эцсийн байдлаар шийдээгүй учраас ажлын хэсэг байгуулаагүй. Ер нь бүлэг дээр ажлын хэсэг байгуулахгүй. Засгийн газар төслийг хөгжүүлэх, үр ашгийг нэмэгдүүлэх саналуудыг боловсруулаад бүлэг дээр танилцуулах ёстой. Ингээд болж байна гэж үзвэл УИХ дахь АН-ын бүлэг, Аюулгүй байдлын зөвлөл, УИХ зэрэг шат шатанд нь хэлэлцүүлээд явна.  Таван толгойн асуудалд яг өнөөдөр тоо, ашиг орлогын мэдээллийг ярих боломжгүй байна. Яагаад гэвэл тооцоо, үндсэн судалгаагаа нарийвчилж үзэх ёстой . Нийгэмд дутуу мэдээлэл хүргэж болохгүй” гэлээ. Эх сурвалж: www.polit.mn