С.САРУУЛ Ерөнхийлөгч Х.Баттулга баруун аймгуудад ажиллахдаа Маршал Ю.Цэдэнбалын  хөшөөнд цэцэг өргөөгүй нь  олон хүнийг эгдүүцүүлэв бололтой.  Цахим орчинд “Х.Баттулга  Төрийн тэргүүн, эв нэгдлийг илэрхийлэгч. Монголын ард түмэн З.Энхболдыг биш Х.Баттулгыг сонгосон.Ийм атал Үндэсний эв нэгдлийг илэрхийлэгчийн үүргээ умартаж, Монголын Төрийг 44 жил удирдсан Ю.Цэдэнбалын хөшөөнд цэцэг өргөсөнгүй” хэмээн дургүйцлээ илэрхийлсэн иргэдийн сэтгэгдэл хөвөрч байна. Ерөнхийлөгчийг Увс аймагт очихын өмнөх орой аймгийн Засаг даргын Тамгын газраас Ю.Цэдэнбалын хөшөөнд цэцэг өргүүлэхээр бэлтгэсэн ч “Увсад цэцэг өргөх боломжгүй” гэж хариулсан аж. Гэтэл   Ю.Цэдэнбалын хөшөөнд цэцэг өргөөгүй Ерөнхийлөгч  Улаангомд байх Х.Баянмөнх аваргын хөшөөн дээр очиж зургаа татуулсан нь сөрөг имиджээр  хурдтай түгэж байна. Ийнхүү Ю.Цэдэнбал даргын хөшөөнд өргөдөг уламжлалыг уландаа гишгэж, үл тоосон гэх иргэдийн хатуу шүүмжлэлд АН-ын дарга С.Эрдэнэ хариу барьжээ. Тэрээр “Тухайн үеийн Орос коммунистуудын гар хөл болж Монголыг дарангуйлж хаан шиг амьдарч байсан хэн дуртайгаа хэлмэгдүүлж байсан хүнийг удирдагч болгож магтан дуулахаа ядаж больчихооч. Хэлмэгдүүлэлтэд нь өртөж амь нас, ар гэр, үр хүүхдээрээ хохирсон олон мянган хүний өмнөөс чамд бичив” гэжээ. С.Эрдэнэ гэдэг хүн гэхээс илүү Их хуралд суудалтай, сөрөг хүчний дуу хоолой болж буй АН-ын даргынх  гэж уншигдаад буй энэ байр суурь  олон нийтэд эвгүй сэтгэгдэл төрүүлж байгаа юм. Э.Бат-Үүл хотын мээр байхдаа Бурхан халдун ууланд мөргөхөөр явсан хятад иргэдтэй зөрчилдсөн монгол залуусын бичлэг цахим орчинд хурдтай түгэж тэдний өмнөөс Өвөрмонголчуудын өмнө толгой бөхийж байсан удаатай. Харин энэ удаад нэгэн үе улсаа удирдаж, нутгийн иргэдийнхээ бахархал хүндлэлийг хүлээсэн Ю.Цэдэнбалыг үгүйсгэж, доромжилж байгаа АН-ын дарга С.Эрдэнийн эвгүй үйлдлийн үр дагавар яаж гарч, санал шүүмжлэл хэрхэн өрнөх бол. Үе үеийн төрийн тэргүүн, өндөр албан тушаалтнууд Увс аймагт ирэхдээ улс орныг 44 жил удирдсан түүхт удирдагчийн хөшөөнд цэцэг өргөж хүндэтгэлээ илэрхийлдэг ёсон тогтсоныг Х. Баттулга Ерөнхийлөгч эвдсэн гэх чимээ интернэт орчинд ид шуугиж байна. Эх сурвалж: www.polit.mn