С.САРУУЛ Оюутолгойн гэрээтэй холбоотойгоор АТГ-аас Сангийн сайд асан С.Баярцогт, Татварын ерөнхий газрын дарга асан Б.Ариунсан, “Эрдэнэс-Монгол” компанийн гүйцэтгэх захирал асан Б.Бямбасайхан нарыг саатуулаад байгаа юм. Чингэлтэй дүүргийн Эрүүгийн хэргийн анхан шатны шүүх өнөөдөр /2018.05.01/ С.Баярцогт,  Б.Бямбасайхан нарын хорих хугацааг 15 хоног сунгаж,  Б.Ариунсанг батлан даалтад гаргах шийдвэр гарлаа. Мөн Б.Ариунсанд хилийн хориг тавьсан байна. Шүүх хурлын үеэр С.Баярцогтын өмгөөлөгч Г.Орхон "Прокуророос С.Баярцогтын хорих хугацааг нэг сараар сунгах хүсэлт тавьсан ч, шүүхээс 15 хоногоор сунгасан. Прокурор цагдан хорих үндэслэлээ дахин гэмт хэрэг үйлдэх гэж тайлбарлалаа. Оюутолгойн гэрээг байгуулахдаа дэд ахлагчаар ажиллаж байхдаа албан тушаалаа урвуулсан гэдэг үндэслэл яриад байгаа ч хорих үндэслэлд авлига авсан гэх зүйл заалт байхгүй.  Засгийн газар олон удаа Оюутолгойн гэрээгээр хуралдсан. УИХ энэ гэрээн дээр гурван хоног хэлэлцээд, тогтоол гаргасан. ҮАБЗ-өөс чиглэл өгсөн.   Тухайн үеийн Засгийн газар өнөөдрийн Ерөнхийлөгч, Хууль зүй дотоод хэргийн сайд нь ч байсан.  Төр чиг үүрэг өгсөн хүмүүсээ хорьж өгч байгаа нь буруу. Өөрөө томилж явуулсан хүнээ татаж авчраад яллах  нь буруу. Прокуророос ганцхан удаа байцаасан” гэсэн мэдээллийг өглөө. Эх сурвалж: www.polit.mn