Монгол Улсын Ерөнхийлөгч Х.Баттулга өнөөдөр Төрийн ёслол хүндэтгэлийн өргөөнд 2017 оны шилдэг бүтээн байгуулалтаар шалгарсан төсөл, хөтөлбөрүүдийг гүйцэтгэсэн байгууллага, эздэд “Үндэсний бүтээн байгуулалтын дээд шагнал-Төрийн гэрэгэ”-г гардууллаа. Шагналыг төрийн байгууллага, мэргэжлийн холбоо, шинжлэх ухааны байгууллага, эрдэмтэн судлаач, иргэд олон нийтийн төлөөллөөс бүрдсэн ажлын хэсэг нягтлан судалж, сонгон шалгаруулалт хийсний дүнд Монгол Улсын Ерөнхийлөгчийн зарлигаар олгодог. Үүний дагуу Монгол Улсын Ерөнхийлөгч Х.Баттулга 2018 оны дөрөвдүгээр сарын 18-ны өдөр “Үндэсний бүтээн байгуулалтын дээд шагнал-Төрийн гэрэгэ”-ээр шагнах тухай зарлиг гаргасан юм. Зарлигт:

Зарлигийг уншиж сонсгосны дараа Монгол Улсын Ерөнхийлөгч Х.Баттулга “Үндэсний бүтээн байгуулалтын дээд шагнал-Төрийн гэрэгэ”-г гардуулж, үг хэлэв.

Монгол Улсын Ерөнхийлөгч Х.Баттулга “Та бүхний энэ өдрийн амгаланг айлтгая. Бүтээмж, чанарыг дээшлүүлэхийн төлөө идэвх, санаачилга гарган ажиллаж байгаа байгууллагад олгодог Үндэсний бүтээн байгуулалтын дээд шагнал-Төрийн гэрэгэ”-г Та бүхэнд гардууллаа. Бүтээмж, чанар бол Монгол мэт хөгжилд тэмүүлж байгаа үндэстнүүдийн хувьд цаг хугацааг товчлох, хөгжлийг амдах, нөөцийг хөгжлийн гарц болгон хувиргах чадвар олгох хэрэгсэл юм. Өнөөдөр утаа, орон сууц, ажилгүйдэл гээд олон асуудал бий. Энэ олон асуудлыг шийдэхийн тулд “Эрэл” компани Байшин үйлдвэрлэх комбинат оруулж ирсэн. Богино хугацаанд иргэдийг хямд өртгөөр орон сууцжуулах төслийг амжилттай хэрэгжүүлж, үйлдвэрлэлээ нээсэн байна. Энэ бол өнөөдрийн тулгамдсан асуудлыг шийдэх маш том төсөл болсон. Мөн МУИС-ийн номын сан дэлхийн жишигт нийцэхүйц бүтээн байгуулалт болж, өнөөдөр 100 мянга орчим уншигч цугладаг номын сан болсон байна. Их, дээд сургуулиуд МУИС-ийн номын сангийн жишгээр олон номын сан барьж, залууст оюуны хөрөнгө оруулалт хийгээсэй гэж хүсэж байна. Өмнөговь аймгийн төв Даланзадгад сумын Шинэ суурьшлын бүсийн бүтээн байгуулалтыг бид Өмнөговь аймгийн иргэдтэй уулзах үеэрээ очиж үзсэн. Монгол Улс том газар нутагтай. 21 аймгаа шинэчилж, төлөвлөх болсон. Шинээр бүтээн байгуулах болсон гэдгийг говийн энэ аймаг ажил хэрэг болгож Шинэ суурьшлын бүсийн бүтээн байгуулалтыг хийж чадсан байна. Монгол орны хөгжил, хот, аймгуудын хөгжилд нам харгалзахгүй байх ёстой. Хэн энэ ажлыг санаачилсан нь хамаагүй, ажил үргэлжлэх л ёстой. 21 аймаг, 330 сум шинээр төлөвлөгдөж, шинээр баригдах цаг хугацаа болсон гэж Та бүхэнд хэлмээр байна. Амжилт хүсье. Баярлалаа” гэв.   Эх сурвалж: Ерөнхийлөгчийн хэвлэл мэдээллийн алба