Ч.ЗОТОЛ МАХН-аас санаачлан, эрдэмтэн судлаачидтай  хамтран боловсруулсан Дээд хуулийн төслийг   батлахыг  МҮАН, ИЗНН, Монголын Ногоон нам  дэмжиж санамж бичиг байгуулсан. Тэгвэл 21 аймаг, есөн дүүрэгт  дэмжигчдийн холбоо байгуулагдан   идэвхтэй ажиллаж байна. МАХН-ын дарга, Монгол Улсын гурав дахь Ерөнхийлөгч  Н.Энхбаяр, дэд дарга С.Ганбаатар, Н.Удвал нар өчигдөр Баянзүрх дүүргийн иргэд, Ахмадын холбоо ТББ, хувиараа үйлдвэр эрхлэгчид, оёдлын цехийн  ажилчидтай уулзаж Үндсэн хуулийн өөрчлөлт, Дээд хуулийн талаар санал солилцов. Мөн айл, өрхүүдээр орж хуулийн төслөө танилцуулсан юм. Энэ үеэр МАХН-ын дарга, Монгол Улсын гурав дахь Ерөнхийлөгч Н.Энхбаяр, Монгол Улсын дархан аварга Г.Өсөхбаярын аав, Баянзүрх дүүргийн иргэн Ц.Гэлэгжамцынхаар орж Дээд хуулийн талаар ярилцаж, санаа бодлыг нь сонссон юм. Мөн тэднийд хөршүүд нь цуглан хуулийн төслийн талаар сонсч, асуулт асууж, байр сууриа илэрхийлсэн юм. Энэ үеэр гэрийн эзэн Ц.Гэлэгжамц гуайн байр суурийг сонирхлоо. -Дээд хуулийн төслийн талаар та ямар бодолтой байна? -76-тай ярихын оронд Дээд хуулийн төслөө дэмжээд батлуулчихвал болчихно гэж бодож байгаа.  Ялангуяа, тогтолцоог өөрчлөхөөр хуулийн төсөлд тусгасныг дэмжиж байна. -Тухайлбал? -Хоёр танхимтай парламенттай болох нь зөв. Тэгж байж төрийн хяналт сайжирна. Хоёр танхим бие биедээ хяналт тавихын зэрэгцээ батлан гаргаж байгаа хуулиуд чанартай болно. -Та “Дээд хуулийн төслөө дэмжээд батлуулчихвал болчихно” гэлээ. Хууль батлахад иргэдийн оролцоог юу гэж харж байна? -Хүн болгон, өрх бүр Дээд хуулийг батлахыг дэмжиж, бие биедээ, айл хөрш, нэг гудамжныхандаа  сурталчилж уриалах хэрэгтэй. Дээд хуулийн төслөө дэмжээд батлуулчихвал шат шатанд үүсээд байгаа хямрал арилж бүх зүйл зүй зохистой шийдэгдээд явчихна. Тиймээс хуулиа баталчихвал болчихно  гэж бодож байна. Эх сурвалж: “Зууны мэдээ” сонин