Б.ОЧИР Улс орныг хавтгайд нь шуугиулсан элдвийн мэдээлэл хөвөрсөн өдрүүд өнгөрч байна. Энэ сацуу улс төрийн намууд ч дор бүрнээ зөрчилдөн тулалдах ажээ. МАН-ын тухайд Нийслэлийн МАН-ыг тойрсон асуудал их байх шиг байна. Энэ нь Нийслэлийн МАН-ын Бага хурал өнөө, маргаашгүй товлогдох гэж байгаатай холбоотой. 2012 оны УИХ-ын сонгуульд МАН ялагдал хүлээсний дараахан, наймдугаар сард нь Нийслэлийн МАН-ын Бага хурал болж, Ц.Сандуйг даргаар сонгож байжээ. Түүнээс хойш Бага хурал нь хуралдаагүй байна. Өөрөөр хэлбэл, 2016 оны сонгууль өнгөрч, Ц.Сандуй ажлаа өгснөөс хойш Нийслэлийн МАН даргагүй явж ирсэн гэсэн үг. Харин ойрын өдрүүдэд товлогдох Нийслэлийн МАН-ын Бага хурлаас хэн гэдэг дарга тодрох вэ гэдэг энэ намынхны анхаарлын төвд байна гэсэн үг. Ер нь нийслэл бол аль ч намын хувьд сонгуулийн гол цөм нь юм. Нийслэлд, тэр дотроо нийслэлийн хамгийн олон хүн амтай Сонгинохайрхан, Баянзүрх дүүрэгт ялалт байгуулалгүйгээр ямар ч сонгуульд ялна гэж үгүй. Тэр утгаараа том, жижиг ямар ч сонгуулийн “стратегийн орд” нь нийслэл юм. 2016 оны УИХ, Орон нутгийн сонгуульд МАН нийслэлд “гарамгай” ялалт байгуулсан. Тухайн үед нийслэлд Э.Бат-Үүлийг ялна гэдэг зүүдлэх ч боломжгүй эд байлаа. Гэвч сонгууль л бол сонгууль байдаг. МАН ялж, АН буюу Э.Бат-Үүл өвдөг шороодсон. Энэ сонгуулиас ганцхан жилийн дараа 2017 оны Ерөнхийлөгчийн сонгууль боллоо. Харамсалтай нь МАН нийслэлийн есөн дүүргийн долоод нь ялагдал хүлээсэн юм. Энэ сонгуулийн эцэст МАН-аас нэр дэвшигч М.Энхболд Баянгол, Баянзүрх, Сүхбаатар, Сонгинохайрхан, Хан-Уул, Чингэлтэй, Багануур гэсэн долоон дүүрэгт ялагдаж, Налайх, Багахангай хоёрт л ялалт байгуулсан байдаг юм. Ажиглагчид үүнийг “...Сонгуульд ялаад нэг жил болсон нийслэлийг хариуцсан дарга нарын ажилд тавьсан дүн” гэж үзсэн. Энэ сонгуулийн дараа есдүгээр сарын сүүлчээр НИТХ-ын дарга, Нийслэлийн МАН-ын дарга Ц.Сандуй ажлаа өгсөн. Ингэхдээ тэрээр “...Би Нийслэлийн МАН-ыг удирдаж байгаа. Ерөнхийлөгчийн сонгуульд ялагдсан учраас улс төрийн хариуцлагаа хүлээж байна” гэж  мэдэгдсэн байдаг. Тиймээс 2016 оны сонгуулийн дараа Нийслэлийн МАН хийгээд нийслэл хотын удирдах дээд төвшинд томилогдож, сонгогдсон хүмүүстэй энэ намын гишүүд хариуцлага ярьж мэдэхээр байгаа юм. Учир нь МАН-ын хувьд Ерөнхийлөгчийн сонгуулийн дараа “...Намд шинэчлэл хэрэгтэй” гээд даргаа сольсон. Засгийг ч сэлгэсэн. НИТХ-ын дарга, Нийслэлийн МАН-ын дарга ч ажлаа өгсөн. Харин Нийслэлийн Засаг дарга Су.Батболд л хэвээрээ суусаар байгаа. Ерөөс энэ л Нийслэлийн МАН-ын Бага хурлаас хэн гээч нь даргаар сонгогдох вэ гэж гүйлдэх шалтгаан болж байгаа хэрэг. Сонгуулийн бүрэн эрхийн хугацаа талдаа орж байна. 2020 оны сонгууль хүртэл хоёр жил үлдлээ гэсэн үг. Иймд МАН нийслэлд шинэ, зоригтойхон ажлуудыг хийх хэрэгтэй юм. Шуудхан хэлэхэд, шинэчлэл хэрэгтэй болоод байгаа юм. Тэр хүсээд байгаа шинэчлэлийг шинэ хүн буюу шинэчлэгч дарга л хийж чадна. Харин Су.Батболд шиг хурдгүй, эргэж буцсан, хуучин дарга нийслэлд ч, Нийслэлийн МАН-д ч хэрэггүй гэсэн үг. Ийм яриа, байр суурь МАН-д ч газар аваад байна. Эх сурвалж: “Зууны мэдээ” сонин