С.САРУУЛ УИХ-ын гишүүн Д.Гантулгын бүрэн эрхээсээ түдгэлзэх, шалгуулах асуудал сунжирсаар жил тойрлоо. Хууль хяналтын байгууллагын нотолгоон дээр багагүй удсан хэрэг сүүлдээ гишүүнд яллагдах тогтоолыг нь гардуулах гэж хөөцөлдсөөр хаврын чуулгантай золгов. Гэхдээ ээлжит чуулганы эхний өдөр Д.Гантулга гишүүн бүрэн эрхээсээ түдгэлзэж шалгуулахаар болсноо мэдэгдсэн ч  эцсийн мөчид эргээд л хуулиар халхавчилсан намынхаа хамгаалалтад орж байна хэмээн олон нийт халаглаж байна. Д.Гантулгын бүрэн эрхээсээ түдгэлзэх хүсэлтийг эрх баригч намын 65 гишүүн бүлгээрээ хоёр өдөр хэлэлцээд шийдэлд хүрч чадсангүй. Сүүлдээ УИХ-ын Халдашгүй байдлын дэд хороогоор хэлэлцсэн ч хуулийн мухардалд орсон гэдгийг тус хороог даргалдаг, Хууль зүй дотоод хэргийн сайд Ц.Нямдорж хэллээ. Харин Д.Гантулга гишүүн прокуророос яллах тогтоолоо гардсан талаараа баасан гаригт“ Өөрийгөө шалгуулах, үнэнийг олж тогтоох тал дээр идэвхитэй ажиллаж байгаа. Өнөөдөр би яллах тогтоолоо авсан. Яллагдагчаар татагдсан учраас нарийн мэдээлэл өгөх нь хуулийн хүрээнд хориотой" гэсэн бол УИХ-ын Халдашгүй байдлын дэд хорооны хуралдааны талаар Хууль зүй, дотоод хэргийн сайд Ц.Нямдорж “Үндсэн хуулийн цэц их суудлын хуралдаанаараа УИХ-ын тухай хуулийн 6.9.1 дэх заалтыг хүчингүй болгосон нь Д.Гантулга гишүүний бүрэн эрхийг түдгэлзүүлэх тухай прокурорын хүсэлттэй холбоотой асуудлыг хэлэлцэн, шийдвэр гаргахад хууль зүйн ойлгомжгүй байдал үүсгэлээ. Учир нь УИХ Цэцээс гаргасан дээрх шийдвэртэй холбогдуулж, холбогдох хуульд өөрчлөлт хийх ёстой байсан ч хийгээгүй нь нөлөөлсөн. Мөн УИХ-ын гишүүн Д.Гантулга бүрэн эрхээсээ түдгэлзэх хүсэлтийг УИХ-д гаргасан байгаа ч хуульд УИХ-ын гишүүн нь бүрэн эрхээсээ чөлөөлөгдөх хүсэлт  гаргавал Байнгын хороо, УИХ-аар хэлэлцэн, шийдвэрлэнэ” гэсэн зохицуулалт байдаг гэж тайлбарлалаа.  Өөрөөр хэлбэл, УИХ-ын гишүүний бүрэн эрхээсээ түдгэлзэх хүсэлт гаргасан нөхцөлд хэлэлцэн шийдвэрлэх хуулийн зохицуулалт байхгүй учраас МАН-ын бүлгийн 65 гишүүн болон Халдашгүй байдлын дэд хорооны гишүүд хуулийн мухардалд оржээ. Тиймээс  хуулийг тодорхой болгож, Прокурорын хүсэлтийг хэлэлцэн, Д.Гантулга гишүүний бүрэн эрхийг түдгэлзүүлэх асуудлыг эцэслэн шийдвэрлэхээс аргагүй нөхцөл үүсээд байгаа аж. Эх сурвалж: www.polit.mn