Б.ОЧИР Төрийн хэрэг ийм дээрээ тулна гэж байдаг л юм байна. Юу гэвэл, Боловсролын яам гэж бантан хутгадаг газар бий болоод байгаа юм. Хамгийн сүүлд энэ яамтай холбоотой орооцолдсон нэг хэрэг мандлаа. БСШУСЯ-ны Төрийн захиргааны удирдлагын газрын дарга С.Мөнхөөлэй гэж Ц.Цогзолмаа сайдын найз байдаг гэж хэвлэлүүдээр их бичигдсэн. Тэгвэл түүнийг энэ албанд томилсон нь хууль дүрэм зөрчсөн байна гэж АТГ-аас хяналт шалгалт хийж, энэ томилгоогоо хуулийн дагуу болго гэж тус яамны Төрийн нарийн бичгийн даргын үүрэг гүйцэтгэгчид үүрэг болгожээ. С.Мөнхөөлэй даргын учрыг олж чадаагүй байтал нөгөөх нь 2018 оны гуравдугаар сарын 30-ны өдөр Гадаад харилцааны яамны Консулын газрын захирал Я.Ариунболдод хандаж “...Сайдын зөвлөх Г.Атармаад албан паспорт олгоно уу” гээд албан тоот илгээжээ. Албан буюу ногоон паспорт хүсэх нь асуудлын гол биш юм. Хамгийн гол нь  Ц.Цогзолмаа сайдад Г.Атармаа гэдэг зөвлөх ог байдаггүй юм байна.  Энэ талаар “Зууны мэдээ” сонин, www.ikon.mn сайт мэдээлсэн байна. Харин томилгоо нь асуудалтай Төрийн захиргаа удирдлагын газрын даргын огт байхгүй зөвлөхөд ногоон паспорт хүссэн бичиг нь Гадаад харилцааны яамны Консулын газрын захирал Я.Ариунболдод ирээгүй гэнэ. Я.Ариунболд энэ талаар цахим хуудастаа бичжээ. Тэрээр “...Энэ бол үндэслэлгүй худал мэдээлэл гэдгийг мэдэгдье. Манай газарт ийм бичиг ирээгүй” гэжээ. Энэ бол жинхэнэ холион бантан. Одоо тэгэхээр яахав гэж Боловсролын яам, Ц.Цогзолмаа сайдын  хавиар асуудал болж байгаа дуулдаж байна. Энэ хэл амнаас мултрахын тулд Цо сайд эхлээд Г.Атармааг албан ёсны зөвлөхөөр томилж, дараа нь Төрийн захиргаа удирдлагын газрын даргын үүрэг гүйцэтгэгч С.Мөнхөөлэйгийн томилгоог хуулийн дагуу болгох бололтой юм. Эх сурвалж: www.polit.mn