М.БААСАНДЭЛГЭР Зорчигч тээврийн нэгтгэлийн “Эв нэгдэл” үйлдвэрчний эвлэлийн хорооноос цаг үеийн асуудлаар мэдээлэл хийлээ. Сүүлийн үед “Автобус-1” ҮЭХ-ны дарга байсан Н.Төрбат гэх хүн өөрийн бүрэн эрхийн хугацаа нь дууссан.  Гэсэн ч энэ шийдвэрийг үл тоож өөрийн эрх, ашиг сонирхолын үүднээс Нийслэлийн удирдлага болон хэвлэл мэдээллээр удаа дараа ташаа мэдээлэл өгсөн. Энэ нь бидний нэр хүндэд халдаж байгаад гомдолтой байгаа гэдгээ ажилчид ярив. Троллейбусны жолооч З.Өлзий-Тогтох “Н.Төрбат нь ҮЭХ дарга байх хугацаандаа бүх ажлыг маргаантай, будлиантай хийдэг байсан. Ажилчдынхаа төлөө ямар ч ажил хийгээгүй. Харин ч биднээс хурааж авсан татварын мөнгө болох 36 сая төгрөг, шүүхээр татварын мөнгө гэж гаргуулж авсан 28 сая төгрөг, нийт 60 гаруй сая төгрөг авсан. Энэ мөнгийг юунд зарцуулсан нь тодорхой бус байна” гэсэн юм. Өмнөх гурван баазын ҮЭХ-ны дарга нар 2015 оны тавдугаар сард ажил хаялт зохион байгуулж, ажилчид 14 хоног цалингүй болж банкны зээлээ төлж чадахгүй хохирч байсан удаатай аж. “Эв нэгдэл” ҮЭХ-ны дарга Ц.Ариунбаатар “Бидэнд цаашид нийтийн тээврийн газар болон ”Улаанбаатар смарт карт” компанитай хамтран хийх олон ажил бий. Мөн ажилчдынхаа төлөө хийх төлөвлөсөн олон зүйл байна. Иймд бидний нэрийг барьж бусдад буруу, ташаа мэдээлэл өгөхгүй байхыг хүсч байна” гэлээ. Тус ҮЭХ нь 2016 онд байгуулагдсан бөгөөд 1500 гаруй ажилтантай. Хуульд заасны дагуу ажилчдын эрх ашиг сонирхлыг хамгаалан үйл ажиллагаагаа хэвийн явуулж байгаа аж. Эх сурвалж: www.polit.mn