Б.ДАМДИН-ОЧИР Сонгуульд ялсан нам нь засгаа бүрдүүлж, түүгээр дамжуулан бодлогоо хэрэгжүүлдэг. Ер нь бол амлалтаа биелүүлэхээр ажилладаг гэвэл зохино. Тэгвэл 2016 оны Орон нутгийн сонгуулиар нийслэлд МАН ялалт байгуулж байв. Сонгуулийн дараа Нийслэлийн МАН-ын дарга Ц.Сандуй НИТХ-ын дарга болж байлаа. Гэвч мань эр жилийн дараа НИТХ-ын дарга, Нийслэлийн МАН-ын даргын ажлаа өгөөд явчихсан. Чухам юунаас болж ийм явдал болсныг олон нийт маш сайн мэдэж байгаа. Харин Ц.Сандуйг явснаас хойш Нийслэлийн МАН албан ёсны даргатай бололгүй өнөөдрийг хүрчээ. Сүүлийн үед Нийслэлийн МАН-ын гишүүд “...Хэзээ албан ёсны даргатай болох вэ” гэсэн асуултыг тавьж, хариултыг нь хэнээс авахаа мэдэхгүй гацчихаад байгаа ажээ. Уг нь Нийслэлийн МАН-ын даргыг МАН-ын Үндсэн дүрмийн дагуу Бага хурлаас сонгох ёстой юм байна. Тус дүрмийн 4-ийн 11 дүгээр зүйлийн “Аймаг, нийслэлийн намын дээд байгууллага” гэсний 11.1-т “...Аймаг, нийслэлд намын удирдах дээд байгууллага нь аймаг, нийслэлийн намын Бага хурал, түүний чөлөөт цагт аймаг, нийслэлийн намын хорооны хурал байна”,12.1.6-т “...Аймаг, нийслэлийн намын хорооны даргыг энэ дүрмийн 20.3.14-т заасан журмын дагуу сонгоно” гэжээ. Гэвч Нийслэлийн МАН-ын Бага хурал хуралдалгүй дөрвөн жил гаруйн нүүрийг үзэж байгаа юм байна. 2012 оны наймдугаар сард хамгийн сүүлд хуралдаж, тэр хурлаас Ц.Сандуйг Нийслэлийн МАН-ын даргаар сонгож байсан юм байна. Харин Ц.Сандуй дарга Нийслэлийн МАН-ын даргын ажлаа Нийслэлийн Засаг дарга Су.Батболдод хүлээлгэж өгчихөөд явсан байдаг. 2017 оны аравдугаар сарын 26-нд Нийслэлийн МАН-ын Тэргүүлэгчид хуралдаж Су.Батболдод энэ үүргийг шилжүүлжээ. Гэтэл одоо дээр хэлсэнчлэн Нийслэлийн МАН-ын гишүүд Бага хурлыг хуралдуулж, албан ёсны даргатай болохыг намаасаа шаардаад эхэлсэн байна. Хэрвээ МАН энэ санал, шаардлагыг хүлээн авч Нийслэлийн МАН-ын Бага хурлыг хуралдуулна гэвэл Үндсэн дүрмийнхээ 4-ийн 11.3-т "...Аймаг, нийслэлийн намын хорооны тэргүүлэгчид нь Удирдах Зөвлөлөөс өгсөн чиглэлийг үндэслэн Бага хурлын тов. төлөөлөонийн тоог Бага хурал хуралдахаас 30 хоногийн өмнө тогтоож. төлөөлөгч сонгох журмыг батална" гэж заасны дагуу Бага хурлыг зарлана. Энэ товыг өнөө маргаашгүй, ойрын үед гаргавал ирэх тавдугаар сард Нийслэлийн МАН-ын Бага хурал хуралдаж, даргаа сонгох боломжтой болж байгаа юм. Эх сурвалж: www.polit.mn