А.ЦЭРЭНДОРЖ Манай орон 1996 оноос хойш Олон улсын Интосаи аудитын дэд байгууллагын 196 гишүүн орны нэгээр элссэн байдаг. Төрийн аудитын байгууллагын удирдах ажилтны зөвлөгөөн өнөөдөр Төрийн ордонд болох гэж байна.   Зөвлөгөөний  удиртгал болсон сургалт өчигдөр эхэллээ. Сургалтад Монгол улсын ерөнхий аудитор Д.Хүрэлбаатар, Ерөнхий аудиторын орлогч нар , ҮАГ-ын хэлтэс, албадын дарга нар, аймаг, нийслэл дэх Төрийн аудитын газрын удирдлага гээд 40 гаруй хүн оролцов. Удирдах ажилтны зөвлөгөөнийг жил бүр зохион байгуулдаг бөгөөд Төрийн аудитын байгууллагын 2017 оны ажлын үр дүнг хэлэлцэж 2018 оны зорилго, зорилтыг тодорхойлох юм байна. Мөн удирдах ажилтнуудын саналыг авч удирдлагын арга барил байгууллагын соёлтой холбоотой асуудлуудыг ярилцаж үр дүнтэй чанартай ажиллах зорилтыг дэвшүүлж ажиллах юм байна.  Өнгөрсөн жилийг сахилга хариуцлага дээшлүүлэх жил болгон зарлаж улсын хэмжээнд аян зохион байгуулж ажиллажээ. Энэ үеэр Үндэсний аудитын газрын Стратеги, удирдлагын газрын дарга Д.Энхболд “Энэ жил аудитын чанарын үр өгөөж дээр илүү их анхаарсан жил байя гэсэн зорилт тавьж байгаа. Тийм учраас тэр чиглэлийн сургалтыг түлхүү оруулсан. Удирдлагын академи болон АТГ-тай хамтарсан сургалт зохион байгуулж байна. Мөн манай төрөлжсөн аудитын газар холбогдох аудитын үйл ажиллагаатай холбоотой анхаарах асуудлаар сургалт зохион байгуулсан. Төрийн ордонд үргэлжлэх хурал дээр үйл ажиллагааны чанар үр өгөөжийг дээшлүүлэх асуудлаар  зөвлөлдөх, хэлэлцүүлэг болно. Өмнөх жилээсээ илүү ахисан төвшинд очих зорилготой байгаа.  Мөн дүрэм журмаа сайжруулахаар болсон. Аудитын чанарыг сайжруулахын тулд иргэдийн оролцоог сайжруулах, энэтэй холбоотойгоор хэд хэдэн ажлуудыг зохион байгуулсан. Манай www.audit.mn цахим хуудас дээр Улсын төсвийн хөрөнгө оруулалтын жагсаалтыг оруулаад сум, баг хороод дээр хэрэгжсэн ажил арга хэмжээг хэр үн дүнтэй болсон бэ гэдэгт саналаа өгөх боломжтой. Мөн өөрсдийн санал хүсэлтэй уламжилдаг болсон” гэв. Эх сурвалж: “Зууны мэдээ” сонин