М.БААСАНДЭЛГЭР Монгол Улсын Ерөнхийлөгч Х.Баттулга өнгөрсөн пүрэв гаригт Сэлэнгэ аймгийн Мандал сумын төв Зүүнхараад очиж иргэдтэй уулзалт хийлээ. Мандал сумын төв нь улсын хэмжээнд байдаг алслагдсан сумдаас хүн амын тоогоороо тэргүүлдэг, дэд бүтэц, төмөр замын сүлжээнд багтсан томоохон сум юм. Мөн энэ суманд  Хүннүгийн үеийн булш, бунхан, түүхийн дурсгалт зүйлсийг агуулсан Ноён уул бий. Уулзалтын үеэр олон иргэд орон нутагт нв уул уурхайн олборлолт явуулахыг эсэргүүцэж байгаагаа Ерөнхийлөгчид хэллээ. Ноён ууланд олборлолт явуулахтай холбоотой асуудлаар нутгийн иргэд Захиргааны хэргийн шүүхэд хандаж, өнөөдрийг хүртэл шүүх ажиллагааны процесс үргэлжилж байгаа юм байна. Энэ талаар иргэд ийнхүү ярьж байна.   “Босоо хөх Монгол” ТББ-ын тэргүүн П.Шинжээравдан: ШҮҮХ ХУРАЛ БОЛОХ БАЙСАН Ч 35 ДАХЬ УДААГАА ХОЙШИЛЖ РЕКОРД ТОГТООЛОО Өмнөх Ерөнхийлөгч “Та нар доороос нь сайн тэмц, би дээрээс нь дэмжээд өгье” гэж Ноён уулын талаар ярьж, хэлж байсан. Бид амиа золин тэмцсэн, жагссан, өлссөн. Өнөөдрийг хүртэл Ноён уулын асуудлаар Захиргааны хэргийн шүүхэд зарга үүссэн явж байгаа. Хэдийгээр Захиргааны хэргийн шүүх дээр торгоогоод явж байгаа ч гэсэн Соёлын өвийг хамгаалах тухай хуулийн дагуу бид Ноён уулаа хамгаалах шаардлагатай байна. Үүнтэй холбоотой хуулийн төслийг Ерөнхийлөгч та санаачилж, өргөн барих хэрэгтэй. Цаашлаад Ноён уулыг ЮНЕСКО-д дэлхийн соёлын өвөөр бүртгүүлэх боломж бий. Байгалийн цогцолборт газар гэдгээс гадна археологийн асар их олдвортой. Дэлхийд ганцхан байгаа Хүннү гүрний баталгаа болох 374 булш, бунхан байгаа энэ сайхан хайрханыг гадны луйварчдад алдах гээд байна. Монголыг тойрсон зах замбараагүй лицензүүд бий. Уул уурхайн асуудал замаа алдсан байгаа шүү. Бэлчээргүй болсон, гол ус нь хордсон гамшгийн байдалд орлоо. Бид Канадын дагавар, колони улс биш шүү дээ. Энэ сарын 21-ний өдөр захиргааны хэргийн шүүх дээр Ноён уул, “Сентерра гоулд”-тай холбоотой шүүх хурал болох байсан ч 35 дахь удаага хойшилж рекорд тогтоолоо. Бид ардын хүүхдэд хатуу, авлигачдад зөөлөн хуулиас айхгүй. Шударга үнэний дуу хоолой болж явахдаа юунаас ч айж, ухрахгүй гэдгээ хэлмээр байна. “Ноён уулаа аваръя” хөдөлгөөний тэргүүн О.Цэрэннадмид: 10 МЯНГА ГАРУЙ ХҮН НОЁН УУЛЫГ УХАХЫГ ЭСЭРГҮҮЦНЭ ГЭЖ ГАРЫН ҮСГЭЭ ЗУРСАН Бид эе эвийг хичээж нам, намчирхал гэсэн зүйлийг болих хэрэгтэй. Би Монгол Улсын Ерөнхийлөгчид Үндэсний аюулгүй байдлын зөвлөлийн тэргүүнийх нь хувьд Монгол Улс үндэсний аюулгүй байдлын хувьд доройтож байна гэдгийг хэлмээр байна. Хүүхдүүд алга болж байна. Эмс охид замбараагаа алдсан. Монгол хүний ген, үүх түүх, өв соёл байхгүй болж байна. Тийм учраас Ноён уулыг монголчуудын язгуурыг устгахын тулд үндэстэн дамнасан, олигархи “Сентерра Гоулд” зэрэг компани ухахаар санаархаж байна. Гэхдээ тэд чадахгүй. Үүний төлөө алтан амиа өргөнө гээд 375 залуу Төрийн өндөрлөгүүдэд мэдэгдлээ хүргүүлсэн. Мөн Мандал сумын 10 мянга гаруй хүн Ноён уулыг ухахыг эсэргүүцнэ гэж гарын үсгээ зурсан. Зөвхөн Мандалын иргэд ч биш дэлхийн 24 орны хуульч, сэтгүүлчид Ноён уулыг хамгаалахаа мэдэгдээд байгаа. Харин Ерөнхийлөгч энэ талаар “Мандал сумын Зүүнхараад ирсэн гол зорилгын нэг нь Ноён уултай холбоотой. Ноён уулыг төрийн хамгаалалтад авна гэж би сонгуулийн өмнө хэлсэн. Энэ амлалтаа мартаагүй байгаа. Миний зөвлөхөөр ажиллаж байгаа Г.Уянга Ноён уултай холбоотой захиргааны хэргийн бүх шүүх хуралд оролцож, надад мэдээлэл өгдөг. Ямар нэг байдлаар энэ ууланд байгаа алт, булш, олдвор зэргийг хамгаалах, хадгалах асуудлаар санаачилгатай ажиллаж байна. Нөгөө талд маш их мөнгөтэй, маш том хуулийн баг ажилладаг. Удахгүй сайн мэдээ сонсоно гэдэгт итгэлтэй байгаа” гэсэн юм. Ноён уулын асуудлыг Ерөнхийлөгч анхааралдаа авч, дорвитой ажил хийхээр төлөвлөж байгаад иргэд сэтгэл өндөр байлаа. Мөн энэ үеэр тэтгэврийн нас, зээл, ажилгүйдэл, оффшорын асуудлаар иргэдийн тавьсан асуултад хариуллаа. Эх сурвалж: “Зууны мэдээ” сонин