С.САРУУЛ Эрх баригч 65-ын бүлэг шинэ оны анхны бүлгийн хуралдаанаа өнөөдөр /2018.01.08/ хийлээ. Тэд тогтсон жаягаараа Төрийн ордны хоёр давхрын баруун жигүүрт хөл хорьж байгаад өдөржин хуралдлаа. МАН-ын бүлэг хуралдаж байгаа үед тухайн өдөр хоёр давхрын баруун жигүүрээр хэнийг ч явуулахгүй өмчлөөд харуул хамгаалалтаа чангалдаг болоод удаж буй. Эрх баригч намынхан цуглаж хуралдаад Засгийн газрын ирэх жилүүдэд хэрэгжүүлэх гурван тулгуурт эдийн засгийн өөрчлөлт, утааны талаарх мэдээллийг сонссон байна. Гэвч агаарын бохирдол гамшгийн хэмжээнд хүрсэн энэ үед утаатай тэмцэх асуудлыг хавар болтол хойшлуулжээ. Учир нь утаа намжих сар гаруйн хугацаанд дорвитой зүйл хийх боломжгүй гэж санал нэгдээд Засгийн газарт хаврын чуулганд шийдэл танилцуулах чиглэл өгсөн байна.Энэ талаар МАН-ын бүлгийн дарга Д.Хаянхярваа ““Засгийн газрын хэрэг эрхлэх газар, Үндэсний хөгжлийн газраас гурван тулгуурт эдийн засгийн өөрчлөлт, 900 хоногт хийж хэрэгжүүлэх ажлын талаар сонсгол хийлээ. Засгийн газар хөдөө аж ахуй, аялал жуулчлал, ажилгүйдэлтэй холбоотой асуудалд голлон анхаарна. Мэдээж уул уурхайн салбар бидний анхаарлын төвд байна. Үлдэж байгаа хугацаанд ямар тодорхой томоохон төслүүдэд анхаарал хандуулж ажиллах вэ гэдгийг намрын чуулганд тодорхой санал гаргаж, хаврын чуулганаар хэлэлцээд явахаар тохиролцсон. Бүлгийн хурлаар хэлэлцсэн дараагийн асуудал нь агаарын бохирдол байлаа. Энэ асуудал маш хүнд төвшинд хүрсэн. Утааны асуудлыг бүх төвшинд анхаарч, цогц арга хэмжээ авч хэрэгжүүлэх нь зүйтэй гэж УИХ дахь МАН-ын бүлэг дүгнэж байна. Иймээс Засгийн газар хаврын чуулганд утааны асуудлыг яг ямар байдлаар хэрэгжүүлэх нь үр дүнгээ өгөх талаар асуудлыг боловсруулж оруулж ир гэдгийг хэлсэн. Утаа бууртал нэг сарын хугацаанд дорвитой ажил хийж чадахгүй. Тийм боломж ч байхгүй. Түүнчлэн утааны асуудлыг бага хөрөнгөөр шийдэхгүй учраас санхүүгийн асуудлыг хэрхэн шийдэх хувилбаруудыг ч ярилцахаар тохирсон. Ингээд агаарын бохирдол, утааг бууруулахын тулд зуух, цахилгаан халаагуур, хийг ашиглахаар бол ямар арга хэмжээ авч хэрэгжүүлэх нь зөв бэ гэдэгт Засгийн газар хаврын чуулганд тодорхой санал оруулж ирэхээр болсон. Агаарын бохирдолтой зэрэгцээд яригдаж байгаа нэг асуудал нь хөрсний бохирдол байна. Нийслэлийн хөрсний бохирдлыг агаарын бохирдолтой хамт шийдэх ёстой гэдгийг олон гишүүн онцолж байна” гэв. Эндээс харахад хавар болтол иргэд утаан дундаа үлдэх нь ээ. Эх сурвалж: www.polit.mn