Т.САЙХАН УИХ-ын чуулганы хуралдаан эхэллээ. Хуралдаанаар Төв банк /Монголбанк/-ны тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн бусад хуулийн төслийн анхны хэлэлцүүлгийг хийж эхэллээ. Хуралдааны эхэнд УИХ-ын гишүүн Б.Пүрэвдорж бондын төлбөрөө хэрхэн хийх талаар тодруулсан юм. Үүний хариуд УИХ-ын дарга М.Энхболд товчхон мэдээлэл хийлээ. Тэрбээр “энэ онд төлөгдөх гурван төрлийн бондын төлбөр хийгдэнэ, бэлэн байгаа. Өнгөрсөн хугацаанд 10,8 хувийн хүүтэй босгож байсан бондыг Засгийн газар 5,6 хувийн хүүтэй босгож чадсан. Ингэснээр бондын хүү хоёр дахин буурч байгаа юм. Түүнчлэн улсын төсвийг нэг их наяд төгрөгийн алдагдалтай баталдаг байсан. Харин энэ жил 500 тэрбум төгрөг төсвийн орлогоос давж биелсэн. Эдийн засгийн хувьд ахиц гарч байгаа гэж үзэж байна” гэв. УИХ-ЫН ГИШҮҮН, ЭРЧИМ ХҮЧНИЙ САЙД Ц.ДАВААСҮРЭН: -Төв банкны тухай хуульд тус банкны Ерөнхийлөгчийн гаргасан тушаал нууц гээд оруулаад өгчихсөн байсан. Ингээд тус банкны Ерөнхийлөгч нь гадныханд үйлчилсэн. Монгол төгрөгөө унагаж, гадны хөрөнгө оруулалттай компаниудад тусалсан. Тиймээс энэ хуульд өөрчлөлт оруулахдаа Төв банкны Ерөнхийлөгчийн дураараа гаргадаг шийдвэрийг хэрхэн хязгаарлаж өгсөн бэ? Бүх шийдвэрээ нууц гэж хуулиар хамгаалуулаад, өөрийнхөө хоёр найзад байр өгсөн байсан. УИХ-ЫН ГИШҮҮН, ЭДИЙН ЗАСГИЙН БАЙНГЫН ХОРООНЫ ДАРГА Д.ДАМБА-ОЧИР: -Төв банкны Ерөнхийлөгч замбараагүй үйлдэл гаргуулахгүй байх үүднээс хязгаарлалт хийж өгсөн. Өөрөөр хэлбэл Төв банкны Ерөнхийлөгч дангаараа нууц шийдвэр гаргах боломжийг хаасан. Эх сурвалж: www.polit.mn