С.САРУУЛ Шийдвэр гаргагчид сүүлийн хэд хоногт утаатай сүрхий тэмцэж байгаа. Төрийн тэргүүнээс эхлээд УИХ, Засгийн газрын түвшинд утааг бууруулах талаар эрчимтэй  ярьж эхлэв. Өчигдөр л гэхэд /2018.01.03/ Төрийн ордонд утаатай холбоотой үйл явдлууд ар араасаа хөвөрсөн юм.  УИХ-аас байгуулсан утаатай тэмцэх Ажлын хэсэг хуралдаж, НЗДТГ болон Засгийн газраас утааны эсрэг технологийн шийдлүүдийг танилцуулав. Мөн Засгийн газар, Их хурал дахь эмэгтэй гишүүд хүртэл хэлэлцүүлэг зохион байгуулав. Тэгвэл Улаанбаатарын утаанд санаа зовж, тэр бүү хэл утааны голомтод амьдардаг нэг гишүүн байна. Энэ талаараа УИХ-ын гишүүн Б.Бат-Эрдэнэ Ажлын хэсгийн хурал дээр “Манай 41-дүгээр байр утааны голомтод байдаг. Яг л аяганы ёроолд тогтсон юм шиг утаатай. Бас Хандгайтын байшин руугаа явсан ч гэсэн замдаа долоон буудал гээд гэр хорооллын утаан дунд байдаг. Тиймээс утааг бууруулах асуудалд анхаарч, Ажлын хэсгийн хурлыг таслахгүй ирнэ. Ер нь утаатай тэмцэхэд гэрийг дулаалахаас гадна ид хүйтний улиралд оюутан сурагчдыг амраагаад хавар, намар хичээл нөхөх боломжтой. Мөн дугуй засварын газар, бүртгэлгүй шилжилт хөдөлгөөнийг цэгцлэх хэрэгтэй” гэсэн юм. Эх сурвалж: www.polit.mn