Т.САЙХАН Агаарын бохирдол нийслэл төдийгүй үндэсний хэмжээний тулгамдсан асуудал хэвээр байна.  Өнөөдөр /10.23/ Ерөнхийлөгч  Х.Баттулгын санаачлагаар  Агаарын бохирдлын үндэсний чуулганыг зохион байгууллаа.  Ер нь хурал чуулган зохион байгуулснаар энэ асуудал шийдэгддэг бол 2011 оноос хойш өнгөрсөн зургаан жилийн хугацаанд бид бохирдлын асуудлыг шийдчих байв.   Өмнөх Ерөнхийлөгчийн үед хэд хэдэн удаа чуулган зохион байгуулж, хамгийн сүүлд гэхэд энэ  оны нэгдүгээр сарын 11-нд Үндэсний аюулгүй байдлын өргөтгөсөн хуралдаан зохион байгуулж байлаа.    Мөн Нийслэлийн Засаг дарга Э.Бат-Үүлийн үед агаарын бохирдлыг асуудлаар хурал 5-6 удаа, С.Батболдын үед гэхэд энэ сарын эхэнд Агаарын  бохирдолд иргэдийн оролцоо нэртэй хурал зохион байгууллаа.    Хурал, чуулганы үеэр энэ асуудалтай холбоотой гарц шийдлүүдийн талаар  ярилцдаг ч хэсэг хугацааны дараа замхран алга болдог энэ асуудалд  өнгөрсөн хугацаанд хангалттай давтагдаж байна.   Мөн агаарын бохирдлыг бууруулахын тулд улсын төсвөөс 2011-2017 онд 97,7 тэрбум төгрөг, улсын төсвийн хөрөнгө оруулалтаар хэрэгжүүлсэн төсөл арга хэмжээнд 2008-2014 онд 49,6 тэрбум төгрөгийн хөрөнгө зарцуулсан байна. Мөн гадаад улс орон, олон улсын байгууллагууд 2008-2016 онд долоон төсөл, хөтөлбөрийг хэрэгжүүлж, 60 орчим сая ам.долларын  зээл, тусламжийн хөрөнгийг олгожээ. Эдгээр хөрөнгө нь сүүлийн зургаан жилд зарцуулагдсан байна. Гэтэл өнөөдөр агаарын бохирдол нэмэгдсэн үү гэхээс буураагүй байна.  Тэгэхээр энэ асуудлыг хурал, чуулган мэтээр  хэлэлцээд нэмэргүй болсон гэдгийг  Ерөнхийлөгч маань өнөөдрийн чуулганаас харсан болов уу. Эх сурвалж:www.polit.mn