С.САРУУЛ Чуулганы нэгдсэн хуралдаанаар /2017.10.19/ У.Хүрэлсүхийн танхимын сайд нарыг томилж байна. БСШУС-ын сайд Ц.Цогзолмааг томилох асуудлыг хэлэлцэх үеэр УИХ-ын гишүүн З.Нарантуяа “Эмэгтэйчүүд олноороо ажилладаг эрүүл мэнд, боловсролын салбарыг эмэгтэй сайд нар толгойлох болсонд баярлаж байна. Эдгээр яамдын Төрийн нарийн бичгийн даргаар ч эмэгтэйчүүд ажиллах боломжтой. Боловсролын салбар нийт төсвийн нэлээд их хувийг эзэлдэг ч хүлээж байгаа үр дүн бага байдаг. Иймд Ц.Цогзолмаа гишүүн үр дүнтэй болгох гарц бодоорой.Нийт иргэдийн суурь боловсрол, ухамсар ёс зүйг дээшлүүлэх дээр соёлын байгууллагуудын үүргийг өөрчилж шинэчлээрэй гэж хүсье. Мөн Ц.Цогзолмаа гишүүн МАН-ын Эмэгтэйчүүдийн байгууллагыг тэргүүлдэг учраас Парламент дахь эмэгтэй гишүүдийн албан бус бүлгийг байгуулж, нэгдмэл зохион байгуулалтад оруулж ажиллахыг хүсч байна. Энэ бүлэг эмэгтэй сайд нарын ажилд их хувь нэмэр оруулна шүү. ОУПХ-ны Эмэгтэй парламентчдын чуулганд оролцох үеэр жендэрийн мэдрэмжтэй шийдвэр гаргахад эмэгтэй гишүүдийн үүрэг оролцоо нэн чухал гэдэг шаардлагыг тавьж байсан. Иймд эмэгтэй гишүүд бид ч бас олон улсын жишгээр хамтран ажиллах ёстой гэж үзэж байна. Эмэгтэй гишүүд бид нам харгалзахгүйгээр  төсвийг зөв зохистой мэдрэмжтэй хуваарилах асуудалд хамтарч ажиллах хэрэгтэй байна” гэлээ. Эх сурвалж: www.polit.mn