Б.ДАМДИН У.Хүрэлсүхийн Засгийн газар бүрдлээ. Одоо МАН-ынхан ирэх арваннэгдүгээр сард болох Их хурлынхаа бэлтгэлийг базааж эхэлнэ. Энэ хурлаар хэлэлцэх хамгийн гол асуудал бол МАН-ын дарга хэн болох вэ гэдгийг шийдэх юм. Үүнтэй холбоотойгоор 2017 оны Монгол Улсын Ерөнхийлөгчийн ээлжит сонгуулийн хариуцлагын асуудал яригдана. Учир нь МАН-ын удирдлагууд Ерөнхийлөгчийн сонгуульд ялагдал хүлээсний хариуцлагыг хүлээнэ гэж эхнээсээ мэдэгдээд байгаа. МАН-ын нэр дэвшигч нь АН-ын Х.Баттулга, МАХН-ын С.Ганбаатар нартай өрсөлдөөд Ерөнхийлөгчийн сонгуулийн эхний санал хураалт /2017.6.26./-аар авсан саналыг тоолоход Архангай, Булган, Говьсүмбэр, Дорнод, Дундговь, Өмнөговь, Хэнтий, Орхон болон нийслэлийн Баянзүрх, Сонгинохайрхан, Чингэлтэй, Налайх дүүрэгт нөгөө хоёрынхоо ард буюу гуравт  орсон. Харин  2017 оны долдугаар сарны 7-нд болсон хоёр дахь санал хураалтад Х.Баттулгатай өрсөлдөж, санал хураахад нийслэлийн есөн дүүргийн хоёроос бусдад нь ялагдал хүлээсэн байна. Мөн Архангай, Баянхонгор, Булган, Дорнод, Завхан, Өмнөговь, Сүхбаатар, Хөвсгөл, Хэнтий, Дархан-Уул, Орхон аймагт ялагдсан байдаг. Энэ сонгуулийн дараахан МАН-ын дарга М.Энхболд хариуцлага хүлээж, намын даргын албаа өгнө гэж мэдэгдсэн байдаг. Мөн Нийслэлийн МАН-ын дарга Ц.Сандуй сонгуулийн хариуцлага хүлээж НИТХ-ын даргын ажлаа өгсөн. Харин МАН-ын Ерөнхий нарийн бичгийн дарга Д.Амарбаясгалан энэ талаар ам ангайлгүй өнөөг хүрэв.  Уг нь Д.Амарбаясгалан 2017 оны Ерөнхийлөгчийн сонгуулиар МАН-ын Сонгуулийн штабыг удирдсан хүн. Сонгуулийн үеэр Засгийн газрын намынхаа сонгуулийн ажилд оролцох оролцоог хязгаарласан гэдэг яриа ч нэлээд гарч байсан юм. Харин сонгуулийн дараагаас МАН-ынхан толхилцоод эхлэхэд нөгөө л “хойд хар овоохой” гэгчээр МАН-ын дарга М.Энхболд, нийслэлийн МАН-ын дарга Ц.Сандуй нарт хамаг бурууг чихээд өнгөрөх шиг болно лээ. Бас МАН-ынхан Ж.Эрдэнэбатын Засгийн газрыг энэ ялдагдалд буруутгаж байгаа юм. Харин сонгууль зохион байгуулсан, удирдсан Ерөнхий нарийн бичгийн дарга Д.Амарбаясгалангийн талаар ярьдаг хэлдэг хүн цөөн байна. Үнэнийг хэлэхэд, хариуцлага Д.Амарбаясгалангаас л эхлэх учиртай юм. Гэтэл МАН-ын дарга, Ерөнхийлөгчид нэр дэвшигч М.Энхболд намын даргын ажлаа өгье гээд мэдэгдчихсэн. Ер нь МАН-ын дарга М.Энхболдын хувьд сүүлийн үед болж буй асуудалд тун намдуу тайван хандаж байгаа. Цовхчоод босоод ирвэл ирэхээр  үйл явдал их л болж байна. Хэвлэлээр ч их гөвүүлж байгаа. Түүнчлэн Ц.Сандуй НИТХ-ын даргын ажлаа өгсөн. Мөн Ж.Эрдэнэбатын Засгийн газар огцорсон. Д.Амарбаясгалан л үлдээд байна. Д.Амарбаясгалангийн талаар нэгэн мэдээлэл ид яригдаж байна. МАН-ын Их хурлаас түүнд хариуцлага тооцож, МАН-ын Ерөнхий нарийн бичгийн даргын ажлаас нь огцруулах байх. Энэ бол өөрийнх нь тооцоолол гэсэн. Хэрэв Д.Амарбаясгалан огцорвол очих газраа хэдийнэ товлочихоод байгаа ажээ. Тэрээр Ц.Сандуйгийн оронд нийслэлийн МАН-ын дарга болоод, Су.Батболдын оронд Хотын дарга болно гээд явж байгаа гэж байна. Гэвч Д.Амарбаясгалан нийслэлийн МАН-ын дарга, Нийслэлийн Засаг дарга болох юм бол Ерөнхийлөгчийн сонгуулийн хариуцлага хүлээгээд бууж байгаа юм биш, харин дэвшиж байна гэсэн үг гэж намынхан нь ярьж байна. Эх сурвалж: “Зууны мэдээ” сонин