С.САРУУЛ УИХ-ын чуулганы нэгдсэн чуулганаар Ерөнхий сайдад нэр дэвшигч У.Хүрэлсүхийг батламжлах асуудлыг хэлэлцэж байна. Гишүүд асуулт асууж, хариулт авч байна. -А.Сүхбат: -Танд ажлын өндөр амжилт хүсье. Ёсзүйн асуудал орхигдсон. Аялал жуулчлал ярих ямар ч боломжгүй. Хөрс, агаарын бохирдлын асуудлаар ямар ажил хийх вэ. Төв цэвэрлэх байгууламжийн талаар зайлшгүй ярих ёстой. -У.Хүрэлсүх: -Цэвэрлэх байгууламжийн асуудлыг шийднэ. -С.Эрдэнэ: -Монгол Улс хэдий хүртэл гадны зээл тусламжийг шүтэж амьдрах юм бэ. Тухайлбал, гадаадын санхүүгийн байгууллагын эрх ашгийг хамгаалдаг валютын сангийн талаар юу гэж бодож байна. Монголынхоо стратегийн ордуудыг хянамаар байна. Оюутолгой олборлолт борлуулалтаа Монголд хянуулдаггүй вант улс болсон. Энэ бүхнийг хууль дүрмийн хүрээнд явуулж чадахуу. Олон тулгуурт эдийн засгийн бүтэц рүү шилжих үү. Хүүхдийн мөнгөний асуудлыг яах вэ. Өмнөх Засгийн газрын сайд нарын туйлж байсан мөнгөнөөс харахад хүүхдийн мөнгийг өлхөн олгох боломж байна лээ. -У.Хүрэлсүх: -Улс орны эдийн засгийн нөхцөл байдал хүнд байгаа. Он гараад маш олон өр төлнө. Эдгээрийг төлөхгүй бол эдийн засаг улам хүндэрнэ. Санхүүгийн сахилга батаа сайжруулах ёстой. Валютын сантай тохирсноо үргэлжүүлэх ёстой. Стратегийн орд газрууд дээр бид хариуцлагатай хандах ёстой. Оюутолгойгоос эхлээд маргаантай асуудал байдаг. Үүнийг эргэж харах ёстой. Манай улс тусгаар тогтносон улсын хувьд баялгаа захиран зарцуулах нь бидний дотоод асуудал. Ард түмэн эзэн нь байх ёстой. Уул уурхайг шүтэж ирсний гай сүүлийн жилүүдэд гарч байна. Үүнийг нэхдэг олон тулгуурт эдийн засагтай байх ёстой. Газрын доорх баялгийг газрын дээрх баялаг болгоё. Хүүхдээсээ юм харамладаг хүн байхгүй. Харамсалтай нь мөнгө санхүүгийн боломж алга. -Д.Тэрбишдагва: -Олон Засгийн газар огцрууллаа. МАН олуулаа суучихаад Засгийн газраа огцруулсныг ойлгохгүй байна. Тиймээс удаан настай Засгийн газар байгаасай гэж хүсч байна. Оюутолгой, Дубайн гэрээг яг яах вэ. Тавантолгойг тэгнэ, Эрдэнэтийн асуудлыг ямар хугацаанд шийдэх вэ гэдэг Ерөнхий сайдын толгойнд байх ёстой асуудал. Эгийн голын цахилгаан станцыг яах вэ. Давхар дээлтэй ажиллах уу. Мөн ажиллах хүчний асуудал үнэхээр чухал байна. Энэ бодлого дээр эрс өөрчлөлт хийж Ажилсаг Монгол хөтөлбөрийг дэмжиж ажиллах уу. Өрийг яг яаж дарах вэ. -У.Хүрэлсүх: -Оюутолгой, Дубайн гэрээр шалгана. Үнэхээр асуудал гарсан бол хуулийн хүрээнд шийдвэрлэнэ. Тавантолгойг хөдөлгөх ёстой. Яаж хөдөлгөх вэ гэдгийг маш сайн ярилцах ёстой. Энэ бол ард түмний өмч бөгөөд үндэсний компаниуд ашиглаж эзэмших ёстой. Эрдэнэтийн асуудлыг хуулийн хүрээнд шийдвэрлэнэ. Эцсийн шийдвэрийг шүүх гаргадаг. Эгийн голын усан цахилгаан станц дээр ОХУ эсрэг байр суурьтай байдаг. Зураг төсөл бэлэн болсон хөтөлбөр хомс байдаг. Асуудлаа ярьж шийдвэрлэж чаддаг бяртай Засгийн газар байгаасай гэж бодож байна. Тиймээс парламентаас бүрдэх Засгийн газар байх болов уу гэж бодож байна. Эх сурвалж: www.polit.mn